Barcelona កំពុងត្រៀមបើកិច្ចពិភាក្សាជាមួយ Paris Saint-Germain ជុំវិញការចុះហត្ថលេខាលើ Neymar ។ ម្ចាស់ជើងឯកក្របខ័ណ្ឌ Ligue 1 នៅតែរក្សាជំហរលក់កីឡាករអន្តរជាតិប្រេស៊ីលរូបនេះ ហើយបានប្រកាន់ខ្ជាប់នូវតម្លៃខ្លួន ២២២ លានអឺរ៉ូ (២០០ លានផោន / ២៤៩ លានដុល្លារ) ដែលពួកគេបានចុះហត្ថលេខាពី Barca កាលពីឆ្នាំ ២០១៧ ។

ជាការពិតណាស់នៅក្នុងទីផ្សាដោះដូរកីឡាករនារដូវក្តៅនេះ មានពត៌មានជាច្រើនបានចុះផ្សាយទាក់ទងនឹងអនាគតរបស់ Neymar ខណះប្រធានក្លឹប Barcelona លោក Josep Bartomeu បានបង្ហាញជាសាធារណៈជាមួយនឹងការអះអាងរបស់គាត់ដែលថាអតីតតារាក្លឹប Santos ចង់ចាកចេញពីទីក្រុងប៉ារីស ។ ហើយខណៈដែល Neymar បានវិលត្រឡប់មកហ្វឹកហាត់ជាមួយក្លឹបយក្សបារាំងវិញហើយ ប៉ុន្តែខ្សែប្រយុទ្ធវ័យ ២៧ ឆ្នាំរូបនេះមិនបានចូលរួមក្នុងការប្រកួត Pre-Season ជាមួយក្លឹបឡើយ ។បើយោងតាមប្រភព Goal ឱ្យដឹងថា PSG ក៏ដឹងអំពីបំណងប្រាថ្នារបស់ Neymar ក្នុងការចង់ត្រឡប់ទៅចូលរួមជាមួយ Barca វិញផងដែរ ហើយការផ្ទេរប្រហែលជាបានកើតឡើងរួចហើយ ប្រសិនបើក្រុមដែលមានសក្តានុពលទិញមិនមែនជាក្រុមអ្នកមានបុណ្យ Barcelona ។ នោះក៏ព្រោះតែទំនាក់ទំនងរវាងក្លឹបទាំងពីរមិនសូវល្អនឹងគ្នា ចាប់តាំងពី Neymar បានសម្រេចចិត្តចាកចេញពីក្លិប Barca ទាំងមិនអាឡោះអាល័យ ជាមួយនឹងការផ្លាស់ទៅកាន់ប្រទេសបារាំង ក្នុងតម្លៃបំបែកកំណត់ត្រា ។ជាលទ្ធផល Paris Saint-Germain នឹងមិនបង្កលក្ខណៈងាយស្រួលសម្រាប់ក្រុមរបស់លោក Ernesto Valverde ក្នុងការបញ្ចប់ការផ្ទេរនេះនោះឡើយ បើទោះបីជាពួកគេដឹងច្បាស់ពីផលប៉ះពាល់អវិជ្ជមានចំពោះទំនាក់ទំនងរវាងក្លឹបជាមួយកីឡាករ មុនពេលចាប់ផ្តើមយុទ្ធនាការថ្មីឆ្នាំ ២០១៩-២០ ក៏ដោយ ៕