ឧត្តមសេនីយ៍ Hossein Salami អគ្គមេបញ្ជាការ នៃកងឆ្មាំបដិវត្តន៍អ៊ីស្លាមអ៊ីរ៉ង់ ត្រូវបានសម្លាប់ ដោយសារការវាយប្រហាររបស់អ៊ីស្រាអែល នេះបើយោងតាមសារព័ត៌មានរដ្ឋអ៊ីរ៉ង់បានរាយការណ៍។

ទីភ្នាក់ងារសារព័ត៌មាន Tasnim ក្នុងស្រុកបានរាយការណ៍ថា "ឧត្តមសេនីយឯក Hossein Salami ដែលជាប្រធានកងឆ្មាំបដិវត្តន៍ឥស្លាមត្រូវបានសម្លាប់នៅក្នុងការវាយប្រហាររបស់របបអ៊ីស្រាអែលលើទីស្នាក់ការ IRGC" ។ ប្រព័ន្ធផ្សព្វផ្សាយរដ្ឋបានរាយការណ៍ថា ការវាយប្រហារនេះក៏បានសម្លាប់អ្នកវិទ្យាសាស្ត្រនុយក្លេអ៊ែរ Fereydoun Abbasi-Davani ផងដែរ។

ទន្ទឹមនោះ ប្រភពសន្តិសុខអ៊ីរ៉ង់បានឲ្យដឹងថា អ៊ីរ៉ង់គ្រោងនឹង 'ឆ្លើយតបយ៉ាងម៉ឺងម៉ាត់' ចំពោះការវាយប្រហាររបស់អ៊ីស្រាអែល ដែលបានចាប់ផ្តើមនៅព្រឹកថ្ងៃសុក្រ ប្រឆាំងនឹងកម្មវិធីនុយក្លេអ៊ែររបស់ខ្លួន ។

មន្ត្រីរូបនេះបាននិយាយថា "ការឆ្លើយតបចំពោះការវាយប្រហាររបស់អ៊ីស្រាអែលនឹងមានភាពតឹងរ៉ឹង និងការសម្រេចចិត្ត" ដោយបន្ថែមថាព័ត៌មានលម្អិតនៃការសងសឹករបស់អ៊ីរ៉ង់ "កំពុងត្រូវបានពិភាក្សាក្នុងកម្រិតខ្ពស់បំផុត" នៅពេលត្រូវបានសួរថាតើការវាយប្រហារនឹងកើតឡើង ឬយ៉ាងណា។

គួរឲ្យដឹងដែរថា រដ្ឋមន្ត្រីការពារជាតិអ៊ីស្រាអែលលោក Israel Katz បានប្រកាសនៅថ្ងៃសុក្រសប្ដាហ៍នេះថា កងទ័ពអាកាសអ៊ីស្រាអែលបានបើកការវាយប្រហារដែលបានគ្រោងទុកទៅលើប្រទេសអ៊ីរ៉ង់ ខណៈនៅព្រឹកថ្ងៃសុក្រនេះ អ៊ីរ៉ង់ប្រកាសដាក់ប្រទេសក្នុងគ្រាអាសន្ន ស្របពេលមានការវាយប្រហារនេះផងដែរ៕