ប្រធានសភាតំណាងរាស្រ្តអាមេរិកលោកស្រី Nancy Pelosi បាននិយាយកាលពីថ្ងៃអាទិត្យ ១០ មករា ថាសភានឹងបន្តនិតិវិធីច្បាប់ដើម្បីចោទប្រកាន់ប្រធានាធិបតីដូ ណាល់ត្រាំដែលបានបង្កឲ្យមានការគំរាមកំហែងដល់លទ្ធិប្រជាធិបតេយ្យបន្ទាប់ពីក្រុមគាំទ្រប្រធានាធិបតីរូបនេះការវាយលុកដ៏សាហាវទៅលើវិមានកាពីតូលកាលពីថ្ងៃពុធកន្លងទៅ។នេះបើតាមការចេញផ្សាយដោយទីភ្នាក់ងារព័ត៌មាន ChannelNewsAsia នៅថ្ងៃចន្ទ ទី១១ ខែមករា ឆ្នាំ២០២១។

លោកស្រី Pelosi បានធ្វើការប្រកាសនៅក្នុងលិខិតមួយទៅកាន់សមាជិកថា សភានឹងធ្វើសកម្មភាពជាបន្ទាន់មួយ និងឲ្យបានមុនពេលលោកត្រាំ ត្រូវចាកចេញពីតំណែងនៅថ្ងៃទី ២០ ខែមករា ដើម្បីរារាំងភាពភ័យរន្ធត់នៃការវាយប្រហារដែលកំពុងកើតមានលើលទ្ធិប្រជាធិបតេយ្យរបស់យើង ដែល ពេលនេះគឺកាន់តែខ្លាំងឡើងហើយ។ លោកស្រីបានបញ្ជាក់ថាក្នុងការការពាររដ្ឋធម្មនុញ្ញនិងលទ្ធិប្រជាធិបតេយ្យរបស់យើង យើងនឹងចាត់វិធានការជាបន្ទាន់ពីព្រោះប្រធានាធិបតីនេះតំណាងឱ្យការគំរាមកំហែងដែលនឹងកើតមានចំពោះប្រទេស ។

ជាមួយនឹងការធ្វើផែនការការចោទប្រកាន់កាន់តែខ្លាំងឡើង សមាជិកព្រឹទ្ធសភាសាធារណរដ្ឋ ២ រូបចង់អោយលោក ត្រាំ លាលែងពីតំណែងភ្លាមៗ ដើម្បីរារាំងលោកត្រាំ ពីការកាន់កាប់ការិយាល័យបោះឆ្នោតជាថ្មីម្តងទៀតបន្ទាប់ពីមានកុបកម្មដែលបណ្តាលឲ្យមនុស្ស៥នាក់ស្លាប់ នៅវិមានកាពីតូល។ គំនិតមួយទៀតដែលកំពុងត្រូវបានពិចារណាគឺមានការបោះឆ្នោតដាច់ដោយឡែកមួយដែលនឹងរារាំងលោកត្រាំ មិនឱ្យកាន់តំណែងជាថ្មីម្តងទៀត ដែលការបោះឆ្នោតនេះត្រូវការតែសំលេងភាគច្រើននៃសមាជិកព្រឹទ្ធសភាចំនួន ៥១ នាក់ប៉ុណ្ណោះនៃសមាជិកព្រឹទ្ធសភាទាំងអស់ ១០០នាក់៕