ខេត្តស្ទឹងត្រែង៖ សាខាកាំកុងត្រូលខេត្តស្ទឹងត្រែងសហការជាមួយកំលាំងចំរុះ កាលពីល្ងាចម្សិលមិញ បានចុះពិនិត្យចំណីអាហារដែលបងប្អូនអាជីវករដាក់តាំងលក់ ក្នុងកម្មវិធីប្រគំតន្ត្រី «ហ្ក្រេម ស្ប័រ» នៅខេត្តស្ទឹងត្រែង  ដោយដកហូតបានមឹកមានសារធាតុ «ហ្វកម៉ាលីន» ចំនួន៣៨គីឡូក្រាម យកមកដុតកម្ទេចចោល ។

ក្នុងសកម្មភាពចុះពិនិត្យចំណីអាហារនេះលោក គឹម ប្រុស ប្រធានសាខាកាំកុងត្រូលខេត្តបានបញ្ជាក់ថា នេះជាសារមួយអាចផ្តល់ការប្រុងប្រយ័ត្នចំពោះចំណីអាហារហើយ បង្គា មឹកនេះ បើមានបងប្អូនអាជីវករនៅតែបន្តលក់ មន្ត្រីជំនាញពាក់ព័ន្ធនឹងផាកពិន័យតាមច្បាប់ ហើយបងប្អូនប្រជាពលរដ្ឋក៏ត្រូវគិតពីសុខភាពផងដែរ ចំពោះការបរិភោគចំណីអាហារគ្រឿងសមុទ្រទាំងនេះ។

លោកថា ការដកហូតនេះ យើងបានលើកកម្ពស់សុខភាពដល់អ្នកបរិភោគ ចៀវាងកុំឲ្យភ្ញៀវទេសចរ ឬប្រជាពលរដ្ឋនៅក្នុងខេត្ ឬទីជនបទបរិភោគចំណីអាហារទាំងនេះ ដែលធ្វើឲ្យមានផលប៉ះពាល់ដល់សុខភាព ជាពិសេសក្នុងពេលដែលបងប្អូនអាជីវករយកមក តាំងលក់ ក្នុងពិធីតាំងពិព័រណ៌លក់ទំនិញនេះ។

លោក ម៉ូ សុខគា មន្ត្រីមន្ទីរពាណិជ្ជកម្មខេត្ត បានបញ្ជាក់ថា នេះជាលើកទី៤ហើយដែលមន្ត្រីជំនាញបានយកចំណីអាហារ មកពិសោធរកសារធាតុគីមី ដូចជា ប្រហិត ត្រី ប្រហិតសាច់គោ បង្គា ប្រហិតក្តាម និងមឹកដែលបងប្អូនអាជីវករយកមកលក់ ឃើញថាអាហារមួយចំនួន មានគុណភាពល្អ ហើយខ្លះទៀតមានសារជាតិ «ហ្វកម៉ាលីន)ច្រើនអាចបង្កផលប៉ះពាល់ដល់អ្នកបរិភោគ។

លោក ជន ភាព អាជីវករលក់គ្រឿសមុទ្រ និងប្រហិតគ្រប់មុខ ក្នុងពិធីតាំងពិព័រណ៌នេះ បានសាទរជាមួយនឹងសកម្មភាពចុះពិនិត្យ នងពន្យល់ណែនាំពីមន្ត្រីសាខាព្រោះថាកាលណាយើងបានត្រួតពិនិត្យ និងបានយល់ដឹង ហាក់ដូចជាបានបង្កើននូវការប្រុងប្រយ័ត្នលើកកម្ពស់ ថែរក្សាសុខភាព ព្រោះពួកគាត់ក៏បរិភោគចំណីអាហារទាំងនេះដែរ។

លោកអះអាងថា កន្លងមក គាត់ធ្លាប់ទិញទំនិញ ខ្វះការត្រួតពិនិត្យ ធ្វើឲ្យទំនិញនោះហួសកាលកំណត់ប្រើប្រាស់ពិបាកលក់ ហើយចំពោះគ្រឿសមុទ្រនេះ បងប្អូនអាជីវករមិនមានឧបករណ៍ពិសោធទេ ជឿជាក់លើតែអ្នកនាំចូល។ ដូច្នេះពួកគាត់សំណូមពរដល់មន្ត្រីជំនាញ នៅតាមព្រំដែន ជួយមើលៗផង។

សូមបញ្ជាក់ថា នេះជាលើកទី៤ហើយដែលសាខាកាំកុងក្រូលបានធ្វើសកម្មភាពទៅលើការដាក់តាំងចំណីអាហារលក់ចល័តរបស់បងប្អូនអាជីវករខ្មែរថៃដែលជាកត្តាមួយបានបង្ហាញឲ្យឃើញពីការយកចិត្តទុកដាក់ ក្នុងការលើកកម្ពស់សុខភាពទាំងអស់គ្នា នៅតាមទីប្រជុំជននិងទីជនបទ៕ អត្ថបទ៖ អ៊ិត តុលា