យន្តហោះយោធាអាមេរិក ដឹកជំនួយមនុស្សធម៌ច្រើនតោនបានចុះចតនៅទីប្រជុំជនកូឡុំប៊ី ជាប់ជាមួយព្រំដែនវេណេហ្ស៊ុយអេឡា កាលពីថ្ងៃទី១៦ ខែកុម្ភៈ ដើម្បីប្រឆាំងប្រធានាធិបតីសង្គមនិយម Nicolas Maduro តែគាំទ្រគូប្រឆាំងរបស់លោកធ្វើជាមេដឹកនាំប្រទេសតំបន់អាហ្វ្រិកខាងត្បូងមួយនេះ ។ 

តាមគម្រោងលើកទី៣ យន្តហោះដឹកទំនិញ Air Force C-17 បានចាកចេញពីបន្ទាយ Homestead Air Reserve Base មូលដ្ឋាននៅរដ្ឋ Florida ទៅចុះចតនៅទីក្រុង Cucuta ប្រទេសកូឡុំប៊ី ។ ទីក្រុងព្រំដែននេះ ពោរពេញដោយលំហូរជនភៀសខ្លួនពីវេណេហ្ស៊ុយអេឡា ជាជម្រើសដែលត្រូវផ្តល់ជំនួយដល់អ្នកគាំទ្រ លោក Juan Guaido មេដឹកនាំរដ្ឋសភាវេណេហ្ស៊ុយអេឡា ដែលអាមេរិក និងបណ្តាប្រទេសដទៃមួយចំនួនទៀត ទទួលស្គាល់ថា ជាប្រធានាធិបតីស្របច្បាប់នៅវេណេហ្ស៊ុយអេឡា ហើយបានអំពាវនាវឲ្យមានការផ្តល់ជំនួយមនុស្សធម៌នោះ ។ 

យន្តហោះពាណិជ្ជកម្មត្រូវបានប្រើប្រាស់សម្រាប់ដឹកជំនួយកាលពីពេលថ្មីៗនេះ ដែលបំណងជួយជ្រោងវិបត្តិសេដ្ឋកិច្ចដ៏ធ្ងន់ធ្ងរ រួមបញ្ចូលអតិផរណា និងកង្វះម្ហូបអាហារ ថ្នាំសង្កូវ រួបរិតប្រជាជនវេណេហ្ស៊ុយអេឡា ។ អ្នករិះគន់និយាយថា ការបោះឆ្នោតម្តងទៀតកាលពីឆ្នាំមុន ពោរពេញដោយការបន្លំ នាំឲ្យ Maduro ឡើងកាន់តំណែងអាណត្តិទី២នោះ ខុសច្បាប់ ។ 

លោក Maduro រួមជាមួយទាហានដែលស្ម័គ្រស្មោះ បានរួមគ្នាបិទផ្លូវនាំជំនួយចូលទៅកាន់វេណេហ្ស៊ុយអេឡា ។ ពួកគេបានហៅជំនួយទាំងនោះថា ជាការ«កម្អួត» របស់អាមេរិក ដែលច្បាមគ្រប់គ្រងធនធានដ៏សម្បូរបែបរបស់វេណេហ្ស៊ុយអេឡា ។ 

ថ្លែងជាមួយភ្នាក់ងារ AFP លោក Maduro ថា «ពួកគេព្យួរកយើង, ប្លន់លុយកាក់របស់យើង បន្ទាប់មក និយាយថា នេះនែ! យកទៅ កម្អួតទាំងនេះ» ។ ដើម្បីសេចក្តីថ្លៃថ្នូរ យើងសូមនិយាយថា ទេ មិនចាំបាច់ទេ បង្ហាញពិភពលោក ។ ពីណាក៏ដោយ ចង់ជួយវេណេហ្ស៊ុយអេឡា គឺយើងស្វាគមន៍ ប៉ុន្តែ យើងមានសមត្ថភាពគ្រប់គ្រាន់ ចំណាយលើអ្វីដែលយើងចង់បាន ។ 

សូមបញ្ជាក់ថា ជំនួយមនុស្សធម៌របស់អាមេរិកកាលពីថ្ងៃសៅរ៍នោះ មានប្រហែល១៨០តោន ចែកចាយពលរដ្ឋជាង២៥ពាន់នាក់ ៕