ក្លឹបជើងឯក Premier League រដូវកាលមុន Manchester City បានប្រកាសពីការធ្វើដំណើរ Pre-Season របស់ខ្លួន ដើម្បីត្រៀមរដូវកាលថ្មី ២០១៩-២០២០ ខាងមុខនៅឯទឹកដីអាស៊ីខាងកើត នាប្រទេសជប៉ុន។ ហើយនៅក្នុងដំណើរការប្រកួតមិត្តភាពនេះ ក្លឹបManchester City បានកំណត់យកប្រទេសជប៉ុន ហើយក៏ជាលើកដំបូងផងដែរសម្រាប់ក្លឹបអ្នកមាននៅលីគកំពូលអង់គ្លេសនេះ ធ្វើដំណើរទៅកាន់ប្រទេសមានអរិយធម៌ចំណាស់ផ្ទាល់ខ្លួនក្នុងតំបន់អាស៊ីខាងកើត ជប៉ុន។

មិនត្រឹមតែជាការធ្វើដំណើរធម្មតាឡើយ កូនក្រុមរបស់លោក Pep Guardiola នឹងត្រូវតតាំងជាមួយក្លឹប Yokohama F.Marinos សមាជិកនៃលីគកំពូលជប៉ុនផងដែរ ដែលត្រូវប្រព្រឹត្តឡើងនាកីឡដ្ឋាន Nissan Stadium ។

ការប្រកួតមិត្តភាពនេះ នឹងកើតឡើងនៅអំឡុងចុងខែកក្កដា ឆ្នាំ២០១៩ ខាងមុខ ខណៈដែលការប្រកួតនេះកើតឡើងក៏ដោយសារតែ Manchester City និង Yokohama F.Marinos គឺស្ថិតនៅក្នុងភាគហ៊ុននៃ City Football Group តែមួយ។

ក្រៅពី Manchester City , Chelsea និង Tottenham Hotspur ក៏នឹងធ្វើដំណើរប្រកួតមិត្តភាពត្រៀមរដូវកាលថ្មីខាងមុខនាទឹកដីអាស៊ីដូចគ្នា ដោយតោខៀវ នឹងហោះទៅជប៉ុន ផងដែរ ខណៈមាន់ខ្នាយមាស នឹងទៅទីក្រុងសៀងហៃ និងប្រទេសសិង្ហបុរី៕