កីឡា ៖ ក្រុមបិសាចក្រហម Manchester United គ្រោងប្រកាសតែងតាំង លោក Ole Gunnar Solskjaer ជាគ្រូបង្វឹកអចិន្រៃ្តយ៍ថ្មីរបស់ក្លឹប នៅចុងខែមីនានេះ ក្រោយលោករួមចំណែកធ្វើឲ្យមានរឿងមិនគួរជឿផងដែរ ពេលប្រកួតទល់នឹង Paris Saint-Germain ដើម្បីឈានទៅវគ្គ៨ក្រុមចុងក្រោយ ១/៤ ផ្តាច់ព្រ័ត្រ នៅក្នុងក្របខ័ណ្ឌ Champions League ។

យោងតាមរបាយការណ៍បានឱ្យដឹងថា Man Utd បានត្រៀមខ្លួនរួចជាស្រេចដើម្បីប្រកាសតែងតាំង Solskjaer ជាគ្រូបង្វឹកអចិន្រៃ្តយ៍ថ្មីរបស់ក្លឹប បន្ទាប់ពីបង្ហាញការដឹកនាំដ៏គួរឱ្យកត់សម្គាល់ជាមួយនឹងការឈ្នះ ១៤លើក ស្មើ២ និងចាញ់តែ ២ដងប៉ុណ្ណោះ ។

គួរបញ្ជាក់ថា បុរសសញ្ជាតិន័រវែស វ័យ៤៦ឆ្នាំរូបនេះត្រូវបានគេតែងតាំងជាគ្រូបង្វឹកបណ្តោះអាសន្នកាលពីថ្ងៃទី១៩ ខែធ្នូ បន្ទាប់ពីការបណ្តេញ លោក Jose Mourinho ក្រោយដឹកនាំក្រុមមិនសូវជោគជ័យ៕