សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ឯកឧត្តម ខៀវ កាញារីទ្ធ ចូលរួមកិច្ចប្រជុំពិនិត្យសេចក្តីព្រាងអនុស្សរណៈនៃការយោគយល់គ្នាបាលី

បាលី៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន អញ្ជើញដឹកនាំប្រតិភូក្រសួងព័ត៌មាន ចូលរួមកិច្ចប្រជុំពិនិត្យលើសេចក្តីព្រាងអនុស្សរណៈនៃការយោគយល់គ្នាបាលី ដើម្បីដោះស្រាយបញ្ហាប្រឈមដែលបង្កឡើងដោយព័ត៌មានមិនពិត ព័ត៌មានមិនល្អ និងការផ្សព្វផ្សាយព័ត៌មានមិនពិតនៅលើវេទិកាប្រព័ន្ធផ្សព្វផ្សាយសង្គម។

២. មន្ត្រីក្រសួងព័ត៌មានចំនួន ២រូប ទទួលបានពានរង្វាន់ពីវិទ្យាស្ថានអាស៊ីប៉ាស៊ីហ្វិក

បាលី៖ មន្ត្រីក្រសួងព័ត៌មានចំនួន ២រូប ទទួលបានពានរង្វាន់ពីរផ្សេងគ្នា ពីវិទ្យាស្ថានអាស៊ីប៉ាស៊ីហ្វិក ដើម្បីអភិវឌ្ឍន៍ប្រព័ន្ធផ្សព្វផ្សាយ (AIBD) កាលពីយប់ថ្ងៃទី២៣ ខែឧសភា ឆ្នាំ២០២៣ នៅកោះបាលី ប្រទេសឥណ្ឌូនេស៊ី ក្នុងឱកាសដែលប្រតិភូក្រសួងព័ត៌មាន ដឹកនាំដោយ ឯកឧត្តមរដ្ឋមន្ត្រី ខៀវ កាញារីទ្ធ ចូលរួមកិច្ចប្រជុំកំពូលប្រព័ន្ធផ្សព្វផ្សាយ អាស៊ីលើកទី១៨ ឆ្នាំ២០២៣។

៣. ព្រះនាង នរោត្តម ជេនណា អាចនឹងក្លាយជាខ្សែរាជវង្សដំបូង ដែលចូលប្រឡូកក្នុងវិស័យK-pop

កូរ៉េខាងត្បូង៖ ព្រះនាង នរោត្តម ជេនណា ត្រូវបានខាងសារព័ត៌មានដ៏ល្បីមួយរបស់កូរ៉េខាងត្បូង ដែលមានឈ្មោះថាKoreaboo ចុះផ្សាយថាព្រះនាង នរោត្តម ជេនណា នឹងត្រូវបានគេរំពឹងថានឹងចូលរួមក្នុងវិស័យK-pop ក្នុងពេលដ៏ឆាប់ខាងមុខនេះ។

៤. Dave Leduc ស្នើសុំឲ្យកម្ពុជា ជួយរៀបចំអង្គរក្សតាមការពារខ្លួន ពេលមកកម្ពុជានាចុងឆ្នាំនេះ

Dave Leduc ដែលគ្រប់គ្នាស្គាល់ថា ជាស្តេចប្រដាល់មីយ៉ាន់ម៉ា បានស្នើសុំឲ្យកម្ពុជា ជួយរៀបចំអង្គរក្សតាមការពារខ្លួន  និងរថយន្តសម្រាប់ធ្វើដំណើរពេល ដែលរូបលោកចូលមកកម្ពុជានាចុងឆ្នាំនេះ។

៥. រដ្ឋមន្ត្រីក្រសួងកសិកម្ម ស្នើឱ្យឆ្នាំទន្លេការពារ និងអភិរក្សផ្សោតបន្ថែម ធ្វើយ៉ាងណាកុំឱ្យមានផ្សោតងាប់បន្តទៀត

ស្ទឹងត្រែង៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានកោតសរសើរឆ្នាំទន្លេចំពោះកិច្ចខិតខំការពារសត្វផ្សោត ដែលជារតនសម្បត្តិជាតិ និងបានស្នើឱ្យបន្តយកចិត្តទុកដាក់លើការការពារ និងអភិរក្សផ្សោតឱ្យមានប្រសិទ្ធភាព ធ្វើយ៉ាងណាមិនឱ្យមានផ្សោតងាប់បន្តទៀត។

៦. វៀតណាម​ស្ថិត​ក្នុង​ចំណោម​ប្រទេស​ទាំង១៥លើ​ពិភពលោកដែល​មាន​អត្រា​អ្នក​ជក់​បារី​​ខ្ពស់​ជាង​គេ

វៀតណាម៖ កាសែត Vietnam News បានរាយការណ៍ថា ប្រទេសវៀតណាមជាប់ចំណាត់ថ្នាក់ក្នុងចំណោមប្រទេសចំនួន ១៥ នៅលើពិភពលោក ដែលមានចំនួនអ្នកជក់បារីបុរសពេញវ័យច្រើនជាងគេ។

៧. នាយករដ្ឋមន្ត្រីចិនស្វាគមន៍នាយករដ្ឋមន្ត្រីរុស្ស៊ីមុនកិច្ចពិភាក្សាទំនាក់ទំនងទេ្វភាគី

ចិន៖ នាយករដ្ឋមន្ត្រីរុស្ស៊ីលោក Mikhail Mishustin នៅទីក្រុងប៉េកាំង សម្រាប់កិច្ចពិភាក្សាផ្លូវការជាមួយនាយករដ្ឋមន្ត្រីចិនលោក Li Qiang ។

៨. លម្អិតពីករណីអគ្គិភ័យឆាបឆេះភូមិគ្រឹះដ៏ធំស្កឹមស្កៃ នៅខណ្ឌពោធិ៍សែនជ័យ

ភ្នំពេញ៖ យោងតាមការចុះផ្សាយរបស់ផេកផ្លូវការ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ បានបញ្ជាក់លម្អិតពីករណីអគ្គិភ័យនៅវេលាម៉ោង​ ០៩:២០​ នាទីព្រឹក ថ្ងៃពុធ ទី២៤ ខែឧសភា ឆ្នាំ២០២៣ មានករណីនេះបានកើតឡើងនៅចំណុចផ្ទះវីឡា ផ្លូវបេតុង ភូមិកាកាប សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ​ ម្ចាស់ទីតាំង​ឈ្មោះ​ សុខ សារ៉ាន ភេទ​ ប្រុស អាយុ ៤១​ ឆ្នាំ​ មុខរបរ​ អ្នកគ្រប់គ្រងទូទៅ ។

៩. កម្ពុជាទទួលបានភ្ញៀវទេសចរបរទេសជិត ១,៣លាននាក់ក្នុងត្រីមាសទី១

ភ្នំពេញ៖ យោងតាមរបាយការណ៍របស់ក្រសួងទេសចរណ៍ បានចេញផ្សាយកាលពីថ្ងៃទី២៤ ថា ប្រទេសកម្ពុជាបានទាក់ទាញភ្ញៀវអន្តរជាតិចំនួន ១,២៩លាននាក់នៅក្នុងត្រីមាសទី ១ ឆ្នាំ ២០២៣ កើនឡើង ៧០៩%​ ពីត្រឹមតែ ១៥៩,៥៤៦ ធៀបនឹងរយៈពេលដូចគ្នាកាលពីឆ្នាំមុន។

១០. ក្រុមអ្នកវិទ្យាសាស្រ្តចិនបានឡើងទៅដល់កំពូលភ្នំខ្ពស់បំផុតរបស់ពិភពលោក

ចិន៖ ក្រុមអ្នកវិទ្យាសាស្រ្តនៃបេសកកម្មចិន កាលពីថ្ងៃទី២៤ បានទៅដល់កំពូលភ្នំ Qomolangma ដែលជាកំពូលភ្នំខ្ពស់បំផុតរបស់ពិភពលោក ដើម្បីធ្វើការស្រាវជ្រាវវិទ្យាសាស្ត្រ។ ភាពអស្ចារ្យនេះបានកើតឡើងជិត ៧០ឆ្នាំ បន្ទាប់ពីបេសកកម្មជោគជ័យលើកដំបូងរបស់មនុស្សជាតិ ដែលបានឡើងទៅកាន់កំពូលភ្នំខ្ពស់បំផុតរបស់ពិភពលោក ដោយជនជាតិនូវែលសេឡង់ Edmund Hillary និង Tenzing Norgay មកពីប្រទេសនេប៉ាល់បានឡើងកំពូលភ្នំ Qomolangma ពីជួរភ្នំភាគខាងត្បូងនៅថ្ងៃទី ២៩ ខែឧសភា ឆ្នាំ ១៩៥៣៕​