ភ្នំពេញ៖ កម្ពុជានឹងរៀបចំបញ្ជូនកីឡាករ-កីឡាការិនីចំនួន ១៦១នាក់ មកពី ១២ប្រភេទកីឡា ទៅហ្វឹកហាត់នៅប្រទេសចិន ដើម្បីត្រៀមចូលរួមព្រឹត្តិការណ៍កីឡាអាស៊ី Hangzhou លើកទី១៩ និង Asian Games លើកទី៣៣ នៅប្រទេសថៃក្នុងឆ្នាំ២០២៥។

ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការអូឡាំពិកកម្ពុជា បាននិយាយថា អត្តពលិកនឹងទៅហ្វឹកហាត់នៅប្រទេសចិនរយៈពេល ១២៥ថ្ងៃ ដែលជាកូតានៅសល់នៃគម្រោងជំនួយបច្ចេកទេសកីឡារបស់រដ្ឋាភិបាលចិនសម្រាប់កម្ពុជា ហើយកម្ពុជានឹងបញ្ជូនអត្តពលិកទៅប្រទេសចិនចំនួន ១៦១នាក់ សម្រាប់ការបណ្តុះបណ្តាលតាមរយៈគម្រោងនេះ។

កាលពី​រសៀល​ថ្ងៃ​ទី​១៧ ខែ​កក្កដា ​គណៈកម្មាធិការ​អូឡាំពិក​កម្ពុជា​ បានបើក​កិច្ច​ប្រជុំ​ជាមួយ​សមាគម​កីឡា​ជាតិ​ជា​ច្រើន ដោយ ឯកឧត្ដម វ៉ាត់ ចំរើន បាននិយាយថា ការហ្វឹកហាត់នៅក្នុងប្រទេសចិនលើកនេះ គ្រោងនឹងចាប់ផ្តើមនៅខែសីហាឆ្នាំនេះ។ ទោះជាយ៉ាងណាក៏ដោយ ប្រភេទកីឡា និងសមាសភាពអ្នកលេងអាចផ្លាស់ប្តូរបន្តិច ដើម្បីបំពេញតាមគោលដៅដែលបានកំណត់។

ឯកឧត្ដម វ៉ាត់ ចំរើន បានស្នើឱ្យសមាគមកីឡាយកចិត្តទុកដាក់លើការជ្រើសរើសអត្តពលិកដែលមានលក្ខខ័ណ្ឌដូចជា អត្តពលិកដែលទៅហ្វឹកហាត់នៅប្រទេសចិនត្រូវតែមានគុណភាពខ្ពស់ និងសម្រេចបានលទ្ធផលក្នុងស៊ីហ្គេម ដើម្បីត្រៀមការប្រកួតកីឡាអាស៊ីលើកទី១៩។ បន្ទាប់មកលើកទឹកចិត្តសហព័ន្ធកីឡា ផ្តល់ឱកាសដល់អត្តពលិកវ័យក្មេង ដើម្បីជំនួសអ្នកដែលចាស់ ឬត្រូវបានវិនិច្ឆ័យថាមិនអាចចូលរួមបាន។

សូមបញ្ជាក់ថា ព្រឹត្តិការណ៍កីឡា Asian Games នឹងធ្វើឡើងនៅទីក្រុង Hangzhou ប្រទេសចិន ចាប់ពីថ្ងៃទី ២៣ ខែកញ្ញា ដល់ថ្ងៃទី ៨ ខែតុលា ប៉ុន្តែអត្តពលិកកម្ពុជា ដែលទៅហ្វឹកហាត់នៅប្រទេសចិន ប្រហែលជាមិនអាចចូលរួមបានគ្រប់ប្រភេទកីឡាទាំងអស់នោះទេ ប៉ុន្តែត្រូវជ្រើសរើសដោយស្ថាប័នជំនាញដែលមានគុណភាព ព្រោះនេះជាការប្រកួតប្រជែងកម្រិតខ្ពស់។ លើសពីនេះ ចំពោះអត្តពលិកមួយចំនួនដែលមិនមានលទ្ធភាពទៅហ្វឹកហាត់នៅប្រទេសចិន ក្រសួងកីឡាកម្ពុជានឹងរៀបចំឱ្យពួកគេហ្វឹកហាត់ឱ្យបានខ្លាំងក្លាបន្ថែម៕ សម្រួលអត្ថបទដោយ៖ Li Xiaoling