សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. នាវាដឹកអ្នកទេសចរជាង ២០០០នាក់ ចូលចតនៅកំពុងផែក្រុងព្រះសីហនុ បំណងទស្សនាកម្ពុជា

នាវាទេសចរណ៍ ឈ្មោះ AIDA Bella សញ្ជាតិ​ ITALY ដែលមានប្រវែងបណ្តោយ​ ២៣០ម៉ែត្រ​ ទទឹង ៣២ម៉ែត្រ ចេញដំណើមកពីប្រទេសសិង្ហបុរី បានចូលចតនៅកំពង់ផែស្វយ័តក្រុងព្រះសីហនុ​ (ផែ​ចាស់)​។

២. អភិបាលក្រុងសិរីសោភ័ណ ផ្តល់ប័ណ្ណសរសើរដល់ពលរដ្ឋ ៥គ្រួសារ ដែលស្ម័គ្រចិត្តកាត់សំយ៉ាបផ្ទះមុនគេ

អភិបាលក្រុងសិរីសោភ័ណ បានចេញប័ណ្ណសរសើរដល់ប្រជាពលរដ្ឋ ដែលមានទីលំនៅតាមបណ្តោយផ្លូវជាតិលេខ៥៦ ព្រោះបានស្ម័គ្រចិត្តកាត់សំយ៉ាបផ្ទះមុនគេចំនួន ៥ល្វែង។

៣. ខេត្តកំពង់ស្ពឺ រៀបចំពិធីក្រុងពលី សែនព្រេន ប្រោសព្រំទៅដល់ក្រុមកីឡាករទូក«ង»

រដ្ឋបាលខេត្តកំពង់ស្ពឺ បានរៀបចំពិធីក្រុងពលី សែនព្រេន ដើម្បីប្រោសព្រំទៅដល់ក្រុមកីឡាករទូក«ង» នាឱកាសអបអរពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ បានរៀបចំឡើងមានរយៈពេល០២ថ្ងៃ គឺថ្ងៃទី១៨-១៩ ដែលប្រារព្ធនៅតាមបណ្តាយស្ទឹង ព្រែកត្នោត ខាងមុខ សួនច្បារព្រះមហាសង្ឃរាជ ជួន ណាត នាថ្ងៃទី១៨ ខែវិច្ឆិកា ឆ្នាំ២០២៣ នេះ។

៤. ករណីបុរសបរទេសម្នាក់ពរក្មេងស្រី អាយុជាង ១ខួប ធ្លាក់ពីលើអគារខុនដូរស្លាប់ទាំងពីរនាក់

បុរសបរទេសម្នាក់ពរក្មេ.ងស្រីអាយុជាង១ខួបសង្ស័យជាកូន ធ្លា.ក់ពីលើអគារខុនដូរ BALI-2 មកក្រោម ស្លា.ប់ទាំងពីរ ដោយមិនទាន់ដឹងមូលហេតុ បង្កការភ្ញាក់ផ្អើលដល់អាជ្ញាធរមូលដ្ឋាន សង្កាត់ទន្លេបាសាក់​ ខណ្ឌចំការមន​ ចុះអន្តរាគមន៍ត្រួតពិនិត្យនិង​ហ៊ុមព័ទ្ធ​ជុំវិញ​កន្លែងកើតហេតុ​ រីឯស្ត្រីបរទេសម្នាក់ទៀតដែល​ខ្លួនប្រាណមានប្រលាក់ឈាមនោះ ត្រូវបានសមត្ថកិច្ចឃាត់ខ្លួននាំយកទៅសួរនាំ​ នៅប៉ុស្តិ៍ភ្លាមៗ​ នៅវេលាម៉ោង១២ថ្ងៃត្រង់​ ថ្ងៃទី១៨ ខែវិច្ឆិកា​ ឆ្នាំ២០២៣ នេះ។

៥. គ្រោះរញ្ជួយដីកម្រិត ៦.៧ រិចទ័រនៅហ្វីលីពីន បណ្តាលឲ្យមនុស្ស ៦នាក់ស្លាប់

ហេតុការណ៍ការណ៍គ្រោះរញ្ជួយដីកម្រិត ៦.៧ រិចទ័រ បានវាយប្រហារនៅលើកោះ Mindanao ក្នុងជម្រៅ ៦០ គីឡូម៉ែត្រ សម្លាប់មនុស្ស ៦ នាក់នៅភាគខាងត្បូង ប្រទេសហ្វីលីពីន កាលពីរសៀលថ្ងៃសុក្រ ។

៦. ឯកឧត្តម ហ៊ុន ម៉ានី ចូលរួមអបអរសាទរកម្ពុជា ដែលបានកត់ត្រាភាពជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២

ការជួបជុំប្រកបដោយភាតរភាពសប្បាយរីករាយ ដើម្បីអបអរសាទរភាពជោគជ័យនៃការធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ នៅពហុកីឡដ្ឋានជាតិមរតកតេជោ។

៧. ត្រៀមអាវរងា និងថែសុខភាពផង! អាកាសធាតុ នៅកម្ពុជា នឹងចុះត្រជាក់ពី ២២-២៤°C

ក្រសួងធនធានទឹក និងឧតុនិយម សូមគោរពជម្រាបជូនអំពីស្ថានភាពអាកាសធាតុនៅព្រះរាជាណាចក្រកម្ពុជាសម្រាប់ថ្ងៃទី១៨ ខែវិច្ឆិកា ឆ្នាំ២០២៣។

៨. គណៈកម្មាធិការជាតិរៀបចំបុណ្យជាតិ-អន្តរជាតិ រៀបចំពិធីបាញ់កាំជ្រួចជប៉ុន នៅមុខព្រះបរមរាជវាំង

គណៈកម្មាធិការជាតិរៀបចំបុណ្យជាតិ –អន្តរជាតិ បានចេញសេចក្តីជូនដំណឹង ស្ដីពីការអុជកាំជ្រួចអបអរសាទរខួបលើកទី ៧០ ទំនាក់ទំនងការទូតកម្ពុជា-ជប៉ុន នាថ្ងៃទី១៩ ខែវិច្ឆិកា ឆ្នាំ២០២៣ នៅមុខព្រះបរមរាជវាំង។

៩. សម្តេចមហាបវរធិបតី ហ៊ុន ម៉ាណែត៖ យើងត្រូវរក្សាស្មារតីកីឡារស់ក្នុងសន្តិភាព ទោះបីជាព្រឹត្តិការណ៍នេះបានបញ្ចប់ក៏ដោយ

សម្តេចមហាបវរធិបតី ហ៊ុន ម៉ាណែតបានមានប្រសាសន៍ថា យើងត្រូវរក្សាស្មារតី «កីឡារស់ក្នុងសន្តិភាព» ជាបន្តបន្ទាប់ទៀត ទោះបីជាព្រឹត្តិការណ៍កីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ បានបញ្ចប់ក៏ដោយជោគជ័យ៕