មន្ទីរវប្បធម៌ និងកីឡា ទីក្រុងហូជីមិញ និងនាយកដ្ឋានព័ត៌មាន និងទំនាក់ទំនងទីក្រុងហូជីមិញ បានសម្រេចធ្វើការស្រាវជ្រាវលើករណីបុរសជនជាតិវៀតណាម ដែលបាននាំក្រុមការងារមកថតនៅប្រាសាទអង្គរវត្តខ្មែរ តែគ្រងសម្លៀកបំពាក់ប្រពៃណីថៃ ហើយយកទៅចែករំលែកក្នុងប្រព័ន្ធបណ្តាញសង្គម Tik Tok អមដោយភ្លេង និងរូបភាពកាត់តបញ្ចូលផ្សេងៗ ដោយចេនាបំភ័នបន្លំឲ្យអ្នកលេងបណ្តាញសង្គមយល់ច្រឡំ ប៉ះពាល់ដល់វប្បធម៌ និងបេតិកភណ្ឌដ៏ផូរផង់របស់កម្ពុជា។លោក Lam Ngo Hoang Anh ប្រធានការិយាល័យវប្បធម៌ និងកីឡាទីក្រុងហូជីមិញ បាននិយាយថា៖ «មន្ទីរវប្បធម៌ និងកីឡា បានទទួលព័ត៌មានពាក់ព័ន្ធនឹងបញ្ហានេះ ហើយក៏កំពុងស្រាវជ្រាវ ផ្ទៀងផ្ទាត់ពីភាគីពាក់ព័ន្ធជាច្រើន។ បន្ទាប់​ពី​ការ​ផ្ទៀងផ្ទាត់ យើង​នឹង​ចាត់​វិធានការ​ទៅ​តាម​បទ​ប្បញ្ញត្តិ»។គួរបញ្ជាក់ថា សកម្មភាពរបស់ TikToker ដែលមានឈ្មោះថាHua Quoc Anh និងក្រុមការងារ ត្រូវបានអ្នកនិយមលេងអ៊ីនធើណែត ថ្កោលទោសយ៉ាងខ្លាំង។ មនុស្សជាច្រើនជឿថា TikToker នេះមិនគោរពវប្បធម៌ បេតិកភណ្ឌ និងអធិបតេយ្យភាពរបស់ប្រទេសកម្ពុជា ហើយថែមទាំងធ្វើឲ្យប៉ះពាល់ដល់ទំនាក់ទំនងរវាងប្រជាជននៃប្រទេសជិតខាងផងដែរ៕