កម្មវិធី CamDEBATE ជាកម្មវិធីពានរង្វាន់ជើងឯកតស៊ូមតិ និងវោហារកោសល្យជាសាធារណៈ បណ្តុះបណ្តាលនិងជម្រុញភាពក្លាហាន ការត្រិះរិះពិចារណា និងជំនាញទំនាក់ទំនងសម្រាប់សិស្សនិស្សិតទូទាំងប្រទេសចាប់ពីកម្រិតវិទ្យាល័យ និងសកលវិទ្យាល័យ។ ដែលបង្កើតឡើងក្នុងឆ្នាំ២០១៩ ដោយស្ថាប័នអប់រំ IDP Education ដែលជាស្ថាប័នឈានមុខគេលើពិភពលោក លើសេវាកម្មប្រឹក្សាយោបល់ទៅសិក្សានៅបរទេស។

ជើងឯក ឬជ័យលាភីនឹងទទួលបានទស្សនកិច្ចសិក្សាទៅចក្រភពអង់គ្លេសរយៈពេល២សប្តាហ៍ អាហារូបករណ៍សិក្សានៅសាលា ACE មួយឆ្នាំពេញ មេដាយ និងរង្វាន់ជាច្រើនទៀត។ កម្មវិធីនេះ នឹងចាប់ទទួលពាក្យថ្ងៃទី០២ ខែមករា ២០២៤ មាន៥ វគ្គ មានវគ្គបណ្តុះបណ្តាល (training sessions) មុននឹងការប្រកួតវគ្គផ្តាច់ព្រ័តនៅ ខែឧសភា ២០២៤ ។

ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន បានបញ្ជាក់ពីការគាំទ្រ និងបន្តកិច្ចសហការរវាងក្រសួងព័ត៌មាន និង ស្ថាប័នអប់រំ IDP Education ក្នុងការរៀបចំកម្មវិធី CamDEBATE ពានរង្វាន់ជើងឯកតស៊ូមតិ និងវោហារកោសល្យជាសាធារណៈ សម្រាប់ឆ្នាំ២០២៤ ខាងមុខនេះផងដែរ ៕

សម្រួលអត្ថបទដោយ៖ ម៉ារីណា