ក្រោយពីបញ្ចប់ថ្នាក់វិទ្យាល័យ ប្អូនៗត្រូវតែជ្រើសរើសមុខជំនាញដើម្បីចូលរៀននៅសកលវិទ្យាល័យ។ យោងតាមបច្ចុប្បន្នគឺមានសិស្សនិស្សិតជាច្រើនដែលគាត់បានជ្រើសរើសជំនាញខុសពីអ្វីដែលខ្លួនស្រឡាញ់ព្រោះតែជ្រើសរើសតាមមិត្តភក្តិ តាមគ្រួសារទាំងដែលខ្លួនយើងមិនសូវដឹងច្បាស់ពីមុខជំនាញទាំងអស់នោះផង។ ការដែលយើងត្រូវរើសមុខជំនាញឲ្យត្រូវតាមអ្វីដែលយើងស្រឡាញ់ នឹងចំណូលចិត្តរបស់យើងគឺជារឿងសំខាន់ណាស់ ដោយហេតុនេះហើយទើបថ្ងៃនេះប្អូនស្រី ម៉ូនីកា បានចែករំលែកពីការជ្រើសរើសមុខជំនាញក្នុងការចូលរៀនសកលវិទ្យាល័យ។ 

១. ស្វែងយល់ពីខ្លួនឯង

យើងត្រូវតែដឹងថាខ្លួនស្រឡាញ់អ្វី និងចូលចិត្តអ្វីជាងគេ នោះទើបធ្វើឲ្យប្អូនៗដឹងថា យើងស័ក្តិសមនឹងជំនាញមួយណា ហើយម្យ៉ាងទៀតពេលដែលយើងជាអ្នកស្រឡាញ់ចូលចិត្តខ្លួនឯងធ្វើឲ្យយើងមិនងាយបោះបង់វាទោះបីជាលំបាកយ៉ាងណាក៏ដោយ។ ដូច្នេះមុននឹងជ្រើសរើសជំនាញចូរប្អូនត្រូវឈ្វេងយល់ពីខ្លួនឯងជាមុនសិន។

២. ស្វែងយល់ពីមុខជំនាញសិក្សា

ការដែលយើងដឹងថាយើងស្រឡាញ់ជំនាញអ្វីហើយ ជំហ៊ានបន្ទាប់យើងត្រូវតែស្វែងយល់ពីមុខជំនាញម្តង វាពិតជាចាំបាច់ខ្លាំងណាស់ក្នុងការសិក្សាស្វែងយល់ឲ្យបានច្បាស់ពីមុខជំនាញដែលយើងចង់បន្តសិក្សា ព្រោះមុខជំនាញទាំងអស់សុទ្ធតែមានចំណុចល្អ នឹងចំណុចខ្សោយ។ ការដែលយើងត្រូវមើលទៅលើទីផ្សារការងារថា មុខជំនាញដែលយើងចង់រៀននឹងទីផ្សារការងារល្អដែរឫទេ ពេលរៀនចប់ងាយស្រួលរកការងារធ្វើទេ។ ដូច្នេះ ការសិក្សាពីមុខជំនាញមុននឹងចូលរៀនគឺពិតជាមានសារៈសំខាន់ណាស់ព្រោះយើងបានយល់ដឹងពីវាច្បាស់។

៣. ស្វែងរកសាលារៀនឲ្យត្រូវតាមជំនាញ

កាលដែលយើងស្វែងរកមុខជំនាញដែលយើងចង់រៀនហើយយល់ដឹងខ្លះពីមុខជំនាញហើយអ្វីដែលសំខាន់នោះគឺយើងត្រូវតែរកសាលារៀនណាដែលសក្តិសមនឹងជំនាញដែលបានជ្រើសរើស។ ប្រាកដណាស់សាលារៀនពិតជាសំខាន់ខ្លាំងណាស់ក្នុងការដែលយើងសិក្សាជំនាញនីមួយៗ ព្រោះយើងត្រូវចំនាយពេលបួនឆ្នាំ ក្នុងការរៀនជាមួយគ្នានឹងបន្តទៅមុខទៀត។ 

ដោយហេតុនេះហើយទើបប្អូនស្រី ម៉ូនីកា បានចែករំលែកមកកាន់សារព័ត៌មាន TNAOT អំពីគន្លឹះក្នុងការជ្រើសរើសជំនាញសិក្សាមុនពេលចូលសកលវិទ្យាល័យព្រោះថាប្អូនក៏បានធ្វើបែបនេះ ហើយទទួលបានជោគជ័យផងដែរ។ ហើយជាចុងក្រោយប្អូនស្រីក៏បានផ្តាំផ្ញើរដល់ប្អូនៗជំនាន់ក្រោយថា ក្នុងការដែលយើងឈានជើងចូលមកដល់ដំណាក់កាលនេះគឺតែងតែមានភាពលំបាកដូចេ្នះយើងត្រូវតែមានភាពអត់ធ្មត់នឹងពុះពារលំបាកទើបយើងទទួលបានជោគជ័យ ស៊ូ ស៊ូ ណាប្អូនៗ៕