លោក អាបឌុល ម៉ាលីក អាល់ហ៊ូទី (Abdul Malik al-Houthi) មេដឹកនាំចលនាហ៊ូទី ដែលមានសម្ព័ន្ធមិត្តជាមួយប្រទេសយេម៉ែន បាននិយាយកាលពីថ្ងៃព្រហស្បតិ៍ (០៤ មេសា) ថា ការវាយប្រហារតាមអាកាសរបស់សហរដ្ឋអាមេរិក និងចក្រភពអង់គ្លេស ចំនួន ៤២៤ ដងលើគោលដៅក្នុងយេម៉ែន បានសម្លាប់មនុស្ស ៣៧ នាក់ និងរបួស ៣០ នាក់ ។

ក្រុមហ៊ូទី ដែលគ្រប់គ្រងរដ្ឋធានី និងតំបន់ដែលមានប្រជាជនច្រើនជាងគេរបស់យេម៉ែន បានវាយប្រហារលើការដឹកជញ្ជូនអន្តរជាតិនៅសមុទ្រក្រហម ចាប់តាំងពីខែវិច្ឆិកា មកក្នុងសាមគ្គីភាពជាមួយប៉ាឡេស្ទីនក្នុងសង្គ្រាមរវាងអ៊ីស្រាអែល និងក្រុមសកម្មប្រយុទ្ធហាម៉ាស ដែលទាក់ទាញការវាយប្រហារសងសឹករបស់សហរដ្ឋអាមេរិក និងចក្រភពអង់គ្លេស ចាប់តាំងពីខែកុម្ភៈ។

លោក អាល់ហ៊ូទី នៅក្នុងសុន្ទរកថាតាមទូរទស្សន៍បាននិយាយថា នាវាចំនួន ៩០ គ្រឿងត្រូវបានដាក់គោលដៅនៅក្នុងសមុទ្រក្រហម ហើយការវាយប្រហារដោយយានដ្រូនបានកើនឡើង និងពង្រីកទៅកាន់តំបន់បន្ថែមទៀត។ លោកបន្ថែមថា ការវាយប្រហារចំនួន ៣៤ លើកត្រូវបានចាប់ផ្តើមក្នុងរយៈពេលមួយខែ ដោយប្រើប្រាស់មីស៊ីលបាលិស្ទិក និងយានដ្រូនសរុបចំនួន ១២៥ គ្រឿង។

ការវាយប្រហាររបស់ក្រុមហ៊ូទី បានរំខានដល់ការដឹកជញ្ជូនទូទាំងពិភពលោក ដោយបង្ខំឱ្យក្រុមហ៊ុននានាចំណាយពេលយូរ និងការធ្វើដំណើរថ្លៃជាងមុននៅជុំវិញចុងភាគខាងត្បូងនៃទ្វីបអាហ្វ្រិក។ សហរដ្ឋអាមេរិក និងចក្រភពអង់គ្លេស បានធ្វើការវាយប្រហារលើគោលដៅរបស់ក្រុមហ៊ូទី ក្នុងការឆ្លើយតបនឹងការវាយប្រហារលើការដឹកជញ្ជូនរបស់ក្រុមនេះ៕

https://www.reuters.com/world/middle-east/houthis-say-37-killed-hundreds-us-uk-strikes-yemen-2024-04-04/