ប្រជាជនអេក្វាឌ័រជាច្រើន បានអំពាវនាវឲ្យទាំងប្រទេសអេក្វាឌ័រ និងម៉ិកស៊ិក ដោះស្រាយការខ្វែងគំនិតគ្នាតាមរយៈមធ្យោបាយសន្តិវិធី បន្ទាប់ពីនគរបាលអេក្វាឌ័រ កាលពីថ្ងៃសុក្រ (ទី៥ ខែមេសា) បានសម្រុកចូលស្ថានទូតម៉ិកស៊ិក ក្នុងទីក្រុងគីតូ ហើយបានចាប់ខ្លួនអតីតអនុប្រធានាធិបតី លោក Jorge Glas ដែលបានជ្រកកោនក្នុងស្ថានទូតនេះ តាំងពីខែធ្នូឆ្នាំមុន។

ប្រធានាធិបតីម៉ិកស៊ិក លោក Andres Manuel Lopez Obrador បានប្រកាសពីការផ្អាកទំនាក់ទំនងការទូតជាមួយអេក្វាឌ័រ នាយប់ថ្ងៃសុក្រនោះ តាមម៉ោងក្នុងស្រុក (ត្រូវនឹងម៉ោង ៤:៣១ ម៉ោងសកល ថ្ងៃសៅរ៍) ដោយហៅចំណាត់ការរបស់អេក្វាឌ័រថា «ជាការរំលោភលើច្បាប់អន្តរជាតិ និងអធិបតេយ្យភាពរបស់ប្រទេសម៉ិកស៊ិក»។

នៅទីក្រុងគីតូដែលជារដ្ឋធានីនៃប្រទេសអេក្វាឌ័រ ប្រជាពលរដ្ឋជាច្រើនបាននិយាយថា អេក្វាឌ័រ និងម៉ិកស៊ិក គឺជាប្រទេសបងប្អូន ដែលមានវប្បធម៌ស្រដៀងគ្នា និងភាសាដូចគ្នា ហើយបញ្ហាគួរតែត្រូវបានដោះស្រាយតាមរយៈការចរចាដោយសន្តិវិធី។ អ្នកស្រុកម្នាក់ បានបញ្ជាក់ថា៖ «ប្រជាជនម៉ិកស៊ិក និងអេក្វាឌ័រ គឺជាបងប្អូននឹងគ្នា។ យើងទាំងអស់គ្នា ចង់ឲ្យវិបត្តិនេះត្រូវបានដោះស្រាយឲ្យបានឆាប់រហ័ស និងដោយយុត្តិធម៌ តាមដែលអាចធ្វើទៅបាន»។

ចំណែកអ្នកស្រុកម្នាក់ទៀត បាននិយាយថា៖ «ក្នុងនាមជាប្រទេសនៅអាមេរិកឡាទីន ប្រទេសរបស់យើងទាំង២ មានទំនាក់ទំនងជាបងប្អូនជាប្រវត្តិសាស្ត្រ។ ការលើកកម្ពស់ឯកភាពក្នុងតំបន់ ពិតជាមានសារៈសំខាន់ណាស់សម្រាប់ការអភិវឌ្ឍរបស់យើង។ ខ្ញុំមិនចង់ឲ្យទំនាក់ទំនងរបស់អេក្វាឌ័រជាមួយម៉ិកស៊ិក ត្រូវរងផលប៉ះពាល់អ្វីឡើយ»។

គួរបញ្ជាក់ថា រហូតមកដល់ពេលនេះ អេក្វាឌ័របានរងការរិះគន់យ៉ាងទូលំទូលាយពីអង្គការសហប្រជាជាតិ និងប្រជាជាតិអាមេរិកឡាទីនមួយចំនួន ហើយអ្នកជំនាញប្រព័ន្ធផ្សព្វផ្សាយម៉ិកស៊ិក កំពុងជំរុញសហគមន៍អន្តរជាតិឲ្យជួយប្រទេសទាំង២ ក្នុងការស្វែងរកដំណោះស្រាយដោយសន្តិវិធី ចំពោះការមិនចុះសម្រុងគ្នានេះ៕

https://youtu.be/CypfmV5ef9o?si=dBEyKnn5qi9L7gu6