ព្រះរាជាណាចក្រកម្ពុជានឹងធ្វើជាម្ចាស់ផ្ទះរៀបចំពិព័រណ៍ពាណិជ្ជកម្មអន្តរជាតិនៅចុងខែសីហា ឆ្នាំ២០២៤ នេះដោយមានពាណិជ្ជករនិងអ្នករកស៊ីវិស័យកសិកម្មមកពីជាង១០ប្រទេស ដែលរំពឹងថា ដើម្បីអភិវឌ្ឍន៍ជំនួញ និងភ្ជាប់ទំនាក់ទំនងទៅកាន់ទីផ្សារអន្តរជាតិ ព្រមទាំងបង្ហាញសក្ដានុពលវិស័យកសិកម្ម និងជលផលរបស់កម្ពុជា។

ថ្លែងនៅក្នុងសន្និសីទសារព័ត៌មាននាព្រឹកថ្ងៃទី ៣១ ខែកក្កដា ឆ្នាំ២០២៤ នៅសណ្ឋាគារហៃយ៉ាត រាជធានីភ្នំពេញ លោក វីន នី ប្រធានគណៈកម្មាធិការរៀបចំ និងនាយកគ្រប់គ្រងក្រុមហ៊ុន VEAS បានគូសរំលេចថា ពិព័រណ៍ពាណិជ្ជកម្មអន្តរជាតិនេះនឹងធ្វើឡើងចាប់ពីថ្ងៃទី ២៨-៣០ ខែសីហា ឆ្នាំ២០២៤ នៅមជ្ឍមណ្ឌលសន្និបាត និងពិព័រណ៍កោះពេជ្រ ដោយមានអ្នកតាំងបង្ហាញប្រមាណ១៥០ក្រុមហ៊ុនមកពីជាង១០ប្រទេសដូចជា កម្ពុជា ,បេឡារូស, ចិន ,កូរ៉េ , ម៉ាឡេស៊ី, ហុល្លង់, ប៉ូឡូញ, រុស្សី, តៃវ៉ាន់, ថៃ, អាមេរិកនិង វៀតណាម និងដាក់បង្ហាញផលិតផលបច្ចេកវិទ្យា និងសេវាកម្មជាច្រើនលើទំហំ៣០០០ម៉ែត្រការ៉េ។

ព្រឹត្តិការណ៍នេះរំពឹងថានឹងមានអ្នកចូលទស្សនាជាង៤០០០នាក់ ដែលជាអ្នកជំនួញនៅក្នុងប្រទេសកម្ពុជា និងមកពីបណ្តាប្រទេសក្នុងតំបន់ ហើយនិងក្លាយជាវេទិការអាជីវកម្មតែមួយគត់សម្រាប់អ្នកជំនួញក្នុងប្រទេសកម្ពុជាដើម្បីអភិវឌ្ឍន៍ជំនួញ និងបង្កើនទំនាក់ទំនងទៅកាន់ទីផ្សារអន្តរជាតិផងដែរ ៕

សម្រួលអត្ថបទដោយ៖ ម៉ារីណា