តំណាងក្រុមហ៊ុនចិន បានសម្តែងនូវសេចក្តីសោមនស្សយ៉ាងខ្លាំង និងបានបង្ហាញនូវឆន្ទៈយ៉ាងមុតមាំក្នុងការវិនិយោគនៅប្រទេសកម្ពុជាប្រកបដោយការទុកចិត្ត និងភាពកក់ក្តៅ បន្ទាប់ពីបានទទួលស្វាគមន៍យ៉ាងកក់ក្តៅក្នុងឱកាសមកស្វែងយល់ពីការវិនិយោគនៅកម្ពុជា និងបន្ទាប់ពីបានស្តាប់បទឧទ្ទេសនាមសង្ខេបរបស់ឯកឧត្តម យុន ហេងអគ្គលេខាធិការរងគណៈកម្មាធិការវិនិយោគកម្ពុជារួចមក។ ក្នុងឱកាសនោះ ឯកឧត្តម យុន បានឧទ្ទេសនាមដោយសង្ខេបអំពី: ស្ថាប័ន ក.អ.ក., ការលើកទឹកចិត្ត និងការធានាវិនិយោគក្រោមក្របខ័ណ្ឌច្បាប់វិនិយោគ, កត្តាអំណោយផលនៃសន្តិភាពនិងស្ថិរភាពនយោបាយ, និងភាពលេចធ្លោនៃហេដ្ឋារចនាសម្ព័ន្ធរូបវន្តរបស់កម្ពុជាដែលកំពុងរីកដុះដាលជាបន្តបន្ទាប់។

បន្ថែមពីនេះ ភាគីខាងតំណាងក្រុមហ៊ុន MUYUAN FOOD ដែលជាក្រុមហ៊ុនវិនិយោគលើវិស័យកសិកម្មដ៏ធំមួយនៅប្រទេសចិន ក៏បានបញ្ជាក់ថា ខ្លួនមានទំនុកចិត្តក្នុងការផ្សព្វផ្សាយទៅកាន់វិនិយោគិនដទៃថា មកវិនិយោគនៅអាស៊ាន ត្រូវនឹកឃើញដល់ប្រទេសកម្ពុជាមុនគេផងដែរ៕