សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១. ប្រមុខរាជរដ្ឋាភិបាល ចូលរួមគោរពវិញ្ញាណក្ខន្ធសពសម្តេចចៅហ្វាវាំង គង់ សំអុល

សម្ដេចមហាបរវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ចូលរួមគោរពវិញ្ញាណក្ខន្ធសពសម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល នៅគេហដ្ឋាននៃសព។

២. កម្ពុជា-ម៉ាឡេស៊ី ធ្វើការរួមគ្នាប្រឆាំងព័ត៌មានក្លែងក្លាយ ពង្រឹងសុវត្ថិភាពនៃការប្រើប្រាស់ព័ត៌មាន

កម្ពុជា-ម៉ាឡេស៊ី បានគូសបានប្តេជ្ញាចិត្តរួមគ្នា ក្នុងការប្រយុទ្ធប្រឆាំងនឹងព័ត៌មានក្លែងក្លាយ និងការផ្លាស់ប្តូរបទពិសោធន៍គ្នាទៅវិញទៅមកលើកិច្ចការព័ត៌មាន និងការផ្សព្វផ្សាយដើម្បីធ្វើឱ្យមានសុវត្ថិភាពព័ត៌មានសម្រាប់អ្នកប្រើប្រាស់។

៣. គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់» សម្រេចបាន ៤៤,៣១%

គម្រោងសាងសង់ «ស្ពានឆ្លងកាត់ទន្លេមេគង្គនៅខេត្តក្រចេះ និងផ្លូវតភ្ជាប់» ប្រវែងសរុប ៣៣,៤៥៩គីឡូម៉ែត្រ សម្រេចបាន ៤៤,៣១%។

៤. ថ្នាក់ដឹកនាំ ជម្រុញវិស័យឯកជនពិចារណាបញ្ចុះតម្លៃ ទាក់ទាញភ្ញៀវទេសចរទៅខេត្តសៀមរាប

ដើម្បីជំរុញការទាក់ទាញអ្នកទេសចរឱ្យមកកម្សាន្តនៅខេត្តសៀមរាប កាន់តែច្រើនថែមទៀតនោះ រាជរដ្ឋាភិបាលកម្ពុជា បានធ្វើកិច្ចការងារជាច្រើន ប៉ុន្តែទាំងអស់នេះ មិនអាចកាត់ផ្តាច់បានពីការចូលរួមពីវិស័យឯកជនបានទេ ហើយក្នុងនោះវិស័យឯកជនត្រូវពង្រឹងការងារបដិសណ្ឋារកិច្ច និងពិចារណាអំពីការបញ្ចុះតម្លៃ។

៥. ភ្លៀងធ្លាក់ខ្លាំងចាប់តាំងពីដើមខែកក្កដា បណ្តាលឲ្យប្រទេសប៉ាគីស្ថានរងផលប៉ះពាល់យ៉ាងធ្ងន់ធ្ងរ

មនុស្សសរុបចំនួន ២៩៣នាក់ស្លាប់ និង ៥៦៤នាក់ផ្សេងទៀតរងរបួសបង្កឡើងដោយភ្លៀងមូសុងនៅប្រទេសប៉ាគីស្ថានក្នុងរយៈពេល ២ ខែចុងក្រោយនេះ ខណៈដែលភ្លៀងធ្លាក់ខ្លាំងបានបន្តបំផ្លិចបំផ្លាញតំបន់មួយចំនួននៅក្នុងប្រទេស។

៦. ប្រទេសចិន និងហ្វីលីពីន ទទួលរងគ្រោះដោយព្យុះទីហ្វុងYagi  

ព្យុះទីហ្វុង Yagi បានសម្លាប់មនុស្ស ១១នាក់ និងរាប់ពាន់នាក់ផ្សេងទៀតត្រូវបង្ខំភៀសខ្លួនទៅកាន់ទីទួលមានសុវត្ថិភាព នៅក្នុងប្រទេសហ្វីលីពីន មុនពេលដែលព្យុះដ៏មានកម្លាំងខ្លាំងនេះបានធ្វើដំណើររំកិល ឆ្ពោះទៅកាន់ខេត្ត Hainan ភាគខាងត្បូងនៃប្រទេសចិន។

៧, កម្មវិធីប្រកួត Malaysia Speed Festival Merdeka Race 2024 ប្រព្រឹត្តិទៅចាប់ពីថ្ងៃទី៣០-0១ ខែកញ្ញា ឆ្នាំ២០២៤ រកឃើញជ័យលាភីហើយ

កីឡាករ ឈឹម ពិសិដ្ឋ បានត្រលប់មកដល់ មាតុប្រទេសវិញហើយ ក្រោយពីរទទួលបានភាពជោគជ័យ ពីការប្រកួត ជម្រុះក្នុងព្រឹត្តិការណ៍ប្រណាំងម៉ូតូ Malaysia Speed Festival (MSF) Merdeka Race 2024 នៅប្រទេសម៉ាឡេស៊ី កាលពីល្ងាចថ្ងៃទី២កញ្ញា និងបាននាំយក បទពិសោធ៍ថ្មី ព្រមជាមួយ និងការតាំងចិត្តខ្ពស់។

៨, ឯកឧត្តម ហែម វណ្ណឌី ណែនាំឱ្យមន្ទីឧស្សាហកម្ម ខេត្តមណ្ឌលគិរី និងរតនគិរីផ្តោតលើការកែច្នៃកសិផល និងនិរន្តរភាពសេវាទឹកស្អាត

មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តមណ្ឌលគិរី និងខេត្តរតនគិរី ផ្តល់អាទិភាពលើសក្តានុពលនៃការកែច្នៃកសិផលក្នុងខេត្ត និងការលើកកម្ពស់និរន្តរភាពនៃសេវាផ្គត់ផ្គង់ទឹកស្អាត។ នេះបើតាមការលើកឡើងរបស់ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះសួរសុខទុក្ខ សំណេះសំណាល និងពិភាក្សាការងារជាមួយថ្នាក់ដឹកនាំ និងមន្ត្រីរាជការនៃមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តមណ្ឌលគិរី និងខេត្តរតនគិរី នៅថ្ងៃទី២ ខែកញ្ញា ឆ្នាំ២០២៤។

៩, លោក​ ឌួង ឆាយ រំភើបចិត្តទទួលបានសមាជិកថ្មីកូនប្រុសទី៤ ថែមទាំងដាក់ឈ្មោះយ៉ាងមានអត្ថន័យ

លោក​ ឌួង ឆាយ ជាអ្នកមានលំដាប់មួយរូបនៅកម្ពុជា ដែលមានជំនួញជាច្រើននៅក្នុងដៃ បានបង្ហោះសារសម្ដែងអារម្មណ៍រំភើប ខណៈភរិយាបណ្ដូលចិត្តបានសម្រាលកូនប្រុសទី៤ ដោយជោគជ័យសុខភាពល្អទាំងម្ដាយ និងទារក ព្រមទាំងមានមុខមាត់ស្អាតគួរឲ្យក្នាញ់ ចំណែកឯឈ្មោះវិញកាន់តែពិរោះ និងមានអត្ថន័យថែមទៀតផង។

១០, រាជរដ្ឋាភិបាលកម្ពុជា ដាក់ចេញផែនការសកម្មភាពជាតិ កាត់បន្ថយហានិភ័យគ្រោះមហន្តរាយ

ផែនការសកម្មភាពជាតិ សម្រាប់ការកាត់បន្ថយហានិភ័យគ្រោះមហន្តរាយឆ្នាំ២០២៤-២០២៨ ត្រូវបានរៀបចំរយៈពេល ៥ឆ្នាំម្ដង តាមអាណត្តិរបស់រាជរដ្ឋាភិបាល និងផែនការយុទ្ធសាស្ត្រអភិវឌ្ឍជាតិ ដោយអនុលោមតាមយុទ្ធសាស្ត្របញ្ចកោណ-ដំណាក់កាលទី១ និងក្របខ័ណ្ឌការងារ សេនដាយ សម្រាប់ការកាត់បន្ថយហានិភ័យគ្រោះមហន្តរាយឆ្នាំ២០១៥-២០៣០ ដែលបានអនុម័តនៅសន្និសីទពិភពលោកលើកទី៣ នៃអង្គការសហប្រជាជាតិ នៅទីក្រុង សេនដាយ ប្រទេសជប៉ុន កាលពីថ្ងៃទី១៨ ខែមីនា ឆ្នាំ២០១៥៕