មនុស្សជាច្រើនយល់ច្រលំការពឹងផ្អែកនិងភាពស្និទ្ធស្នាល ដោយយល់ថាអោយតែគេមកស្និទ្ធជាមួយដឹងតែជាមិត្តល្អ តែការពិតវាផ្ទុយពីការពិត ព្រោះមនុស្សខ្លះចូលមកចិត្តយើងដោយគ្រាន់តែយល់ថាអាចទទួលបានផលប្រយោជន៍ពីយើងប៉ុណ្ណោះ ពួកគេមិនបានចាត់ទុកទំនាក់ទំនងនេះជារឿងសំខាន់ដូចអ្នកគិតនោះទេ។ ខាងក្រោមនេះគឺជាមិត្តទាំង៥ប្រភេទដែលអ្នកគួរតែកាត់ផ្តាច់ចេញពីជីវិត បើសិនជាអ្នកចង់មានជីវិតមួយដ៏រីករាយ និងមានក្តីសុខពិតប្រាកដ៖

១.មនុស្សដែលបំផ្លាញថាមពលរបស់អ្នក៖ មិត្តភក្តិប្រភេទនេះហាក់ដូចជាបំផ្លាញថាមពលជីវិតរបស់អ្នករាល់ពេលដែលអ្នកនៅក្បែរពួកគេ។ ពួកគេតែងតែមានបញ្ហា សោកនាដកម្ម ឬ វិបត្តិផ្សេងៗមិនចេះចប់។ វត្តមានរបស់អ្នកនៅពេលនោះសម្រាប់មិត្តភក្តិក្នុងគ្រាលំបាក គឺជាអ្វីដែលមិត្តត្រូវធ្វើ។ តែដោយសារតែភាពអវិជ្ជមានទាំងនោះ ជីវិតរបស់អ្នកហាក់ដូចជាអាប់អួរទៅតាមពួកគេដែរ។ ពួកគេអាចប្រែក្លាយថ្ងៃដែលមានពន្លឺថ្ងៃដ៏ស្រស់ស្អាតរបស់អ្នកទៅជាងងឹតយ៉ាងឆាប់រហ័ស។ ប្រសិនបើអ្នកមានអារម្មណ៍រំជើបរំជួលបន្ទាប់ពីចំណាយពេលជាមួយមនុស្សម្នាក់នេះ វាដល់ពេលដែលត្រូវកាត់មិត្តភាពនោះចោលហើយ។

២.មនុស្សប្រកួតប្រជែងឥតឈប់ឈរ៖ មនុស្សដែលប្រកួតប្រជែងឥតឈប់ឈរគឺជាមនុស្សដែលចង់ឈ្នះចាញ់ មិនចង់អន់ជាងគេ។ ឧទាហរណ៍ អ្នកទិញឡានថ្មីមួយ បុគ្គលនោះនឹងទៅទិញឡានថ្មីហើយថ្លៃជាងអ្នក។ ដំបូងឡើយ នេះគឺគ្មានគ្រោះថ្នាក់ទេ ប៉ុន្តែតម្រូវការដើម្បីប្រៀបធៀបជានិច្ចនឹងកាត់បន្ថយភាពរីករាយរបស់អ្នក ធ្វើឱ្យអ្នកមានអារម្មណ៍ថាអ្នកមិនល្អគ្រប់គ្រាន់។

៣.មនុស្សដែលអ្នកពឹងផ្អែកលើ៖ មនុស្សជាច្រើនយល់ច្រលំការពឹងផ្អែកនិងភាពស្និទ្ធស្នាល។ ក្នុងទំនាក់ទំនងអាចនឹងមានមិត្តដែលចាំតែពឹងអ្នករហូត សូម្បីតែរឿងលុយកាក់ ការដោះស្រាយបញ្ហា ឬ ការសម្រេចចិត្ត។ ការពឹងផ្អែកនេះនឹងធ្វើឱ្យអ្នកថប់ដង្ហើម មានសម្ពាធផ្លូវចិត្ត និងគ្មានពេលសម្រាប់គិតពីខ្លួនឯង។

៤.មនុស្សដែលនៅក្បែរអ្នកតែពេលសប្បាយចិត្ត៖ នៅពេលអ្នកសប្បាយចិត្ត បុគ្គលម្នាក់នោះនឹងតែងតែមានវត្តមាននៅជាមួយអ្នកគ្រប់ពេល ដើម្បីអបអរភាពជោគជ័យ ឬ កំដរបរិយាកាសដែលសប្បាយរីករាយជាមួយគ្នា។ ប៉ុន្តែពេលអ្នកមានបញ្ហា មិត្តម្នាក់នោះបែរជាមិនសួរនាំអ្នកឡើយ។ ប្រសិនបើអ្នកមានមិត្តដែលបង្ហាញខ្លួននៅពេលដែលអ្វីៗដំណើរការល្អ ហើយបាត់ខ្លួននៅពេលអ្នកជួបទុក្ខ នោះវាដល់ពេលដែលត្រូវពិចារណាឡើងវិញអំពីទំនាក់ទំនងនេះឡើងវិញហើយ។

៥.មនុស្សនិយាយដើមគេ៖ យើងទាំងអស់គ្នាតែងតែស្គាល់នរណាម្នាក់ដែលចូលចិត្តនិយាយដើមគេគ្រប់ពេល។ ពួកគេតែងតែមានព័ត៌មានថ្មីៗ និងមិនភ័យខ្លាចក្នុងការចែករំលែកនោះទេ ដែលជារឿយៗធ្វើឱ្យខូចឈ្មោះដល់អ្នកដទៃ។ នៅពេលដែលមិត្តរបស់អ្នកហាក់ដូចជាចូលចិត្តនិយាយដើមគេ អ្នកប្រហែលជាគួរតែដើរចេញពីមិត្តម្នាក់នោះ៕