សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានមានប្រសាសន៍កោតសរសើរ និងអរគុណដល់ក្រុមការងារ ក៏ដូចជាកញ្ញា កុយ អេនណា ដែលបានខិតខំរៀបចំតុបតែងខ្លួនជា ”ព្រះម៉ែធម្មជាតិ” ដើម្បីបំផុសស្មារតីរបស់ប្រជាពលរដ្ឋក្នុងការចូលរួមការពារធនធានធម្មជាតិ។

តាមរយៈគណនីបណ្តាញសង្គមរបស់ សម្តេចធិបតី ហ៊ុន ម៉ាណែត កាលពីយប់ថ្ងៃទី៣០ ខែកញ្ញា ឆ្នាំ២០២៤ សម្តេចធិបតីបានមានប្រសាសន៍ថា«សូមអរគុណប្អូនៗ ដែលបានខិតខំរៀបចំផលិតនូវទស្សនីយភាពទាំងនេះទ្បើង ក្នុងគោលបំណងដើម្បីទាក់ទាញចំណាប់អារម្មណ៍របស់ប្រជាពលរដ្ឋក្នុងការចូលរួមការពារធនធានធម្មជាតិ។ យើងរួមគ្នាការពារធនធានធម្មជាតិ ដើម្បីអនាគតកូនចៅជំនាន់ក្រោយរបស់យើង»។

បើតាមការឲ្យដឹងតាមរយៈវីដេអូរបស់កញ្ញា កុយ អេនណា ដែលជាបវរកញ្ញាលំដាប់រងទី១ ក្នុងកម្មវិធី Miss Grand Cambodia 2023 បានបង្ហោះនៅលើគណនីបណ្តាញសង្គមកាលពីពេលថ្មីៗនេះបានឲ្យដឹងថា កញ្ញាបានចំណាយពេល ៧ ម៉ោងក្នុងការតុបតែងតែខ្លួនបែបនេះ សម្រាប់អត្ថន័យវិញចង់ផ្តោតទៅលើស្រ្តីជាមាតានៃពិភពលោក ឬឯកស្ត្រី។ រីឯរូបភាពនៃការទ្រផែនដី អមជាមួយធម្មជាតិពណ៌បៃតង និងបង្ហាញទឹកមុខក្រៀមក្រំនោះ គឺចង់បង្ហាញពីការសោកសង្រេង ដែលមនុស្សមួយចំនួនតែងតែមានភាពលោភលន់បែរជាព្យាយាមប្រើគ្រប់វិធីដើម្បីបំផ្លាញធម្មជាតិដែលជាខ្យល់ដង្ហើមរបស់ផែនដីទៅវិញ។ 

កញ្ញា កុយ អេនណា បានបន្តថាតាមរយៈរូបភាពនេះគឺមានអត្ថន័យខ្លាំងដែលអាចពញ្ញាក់ឲ្យអារម្មណ៍មនុស្សជាតិ ងាកមកចូលរួមការពារនិងគិតគូដល់ធនធានធម្មជាតិ ដែលកំពុងតែប្រឈមបាត់បង់ជាបណ្តើរៗ។ ដូច្នេះកញ្ញាសង្ឃឹមថា នៅពេលដែលរូបភាពនេះបានផ្សព្វផ្សាយរួចមក គឺពុកម៉ែបងប្អូនទាំងអស់គ្នាបានយល់ពីអត្ថន័យនឹងចែករំលែកបន្តឲ្យបានច្រើនផងដែរ៕