នៅក្នុងដំណើរទស្សនៈកិច្ចនៅប្រទេសចិននិងបានជួបជាមួយក្រុមអ្នកវិនិយោគចិន អភិបាលនៃគណៈអភិបាលខេត្តតាកែវ ឯកឧត្តម វ៉ី សំណាង បានស្នើទៅដល់ក្រុមហ៊ុន Hangxaio Steel Structure របស់ចិន ឲ្យមក​សិក្សា និង​បណ្តាក់​ទុក​វិនិយោគ​កំពង់​ផែ​នៅ​លើ​ទឹក​ដី​ខេត្ត​តាកែវ នៅជាប់នឹងព្រែកជីកហ្វូណនតេជោ។ថ្លែងក្នុងជំនួបពិភាក្សាការងារជាមួយក្រុមហ៊ុន Hangxaio Stell Structure នៅទីក្រុងសៀងហៃ ប្រទេសចិន នៅថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តម វ៉ី សំណាង បានលើក​ឡើង​អំពី​សក្ដានុពល​សំខាន់ៗ​របស់​ខេត្ត​តាកែវ​ទៅកាន់តំណាងក្រុមហ៊ុន Hangxaio Steel Structure ដោយបច្ចុប្បន្នខេត្តតាកែវ មាន​ផ្លូវ​ដឹក​ជញ្ជូន​តាមផ្លូវគោក ផ្លូវដែកនិងផ្លូវអាកាស។ឯកឧត្តមបន្តទៀតថា ប្រសិនបើក្រុមហ៊ុន​ចិន​ចង់​បង្កើត​កំពុង​ផែ​គួ​រតែ​មក​បង្កើតកំពង់ផែនៅតាមបណ្ដោយព្រែកជីកហ្វូណន ព្រោះព្រែកជីកហ្វូណន​នេះ​ក៏​មាន​ការ​រួម​ចំណែក​ពី​រដ្ឋាភិបាលចិនផងដែរ ហើយឆ្លងកាត់ខេត្តតាកែវចំនួន ៥៧គីឡូម៉ែត្រ។ ការបង្កើតកំពង់ផែនៅក្នុងខេត្តតាកែវជារឿងសមស្របបំផុត ព្រោះនៅខេត្តតាកែវ​ជា​ចំណុច​កណ្តាល​មួយ​ដែលមានរោងចក្រសហគ្រាសយ៉ាងច្រើន ដែលផលិតស្បែកជើងកាបូប។ឯកឧត្តមអភិបាលខេត្តតាកែវក៍បានលើកឡើងពីសក្ដានុពលវិស័យកសិកម្មនៅក្នុងខេត្ត ដោយ​ខេត្ត​មាន​ផ្ទៃដីសម្រាប់បង្កបង្កើនផលចំនួនជាង២២ម៉ឺនហិចតាជាផ្ទៃដីសម្រាប់ដាំដុះដំណាំស្រូវ ក្នុង​នោះទិន្នផលប្រមូលផលចន្លោះពី៤តោនទៅ៨តោនក្នុងមួយហិចតា។ កសិផល​ស្រូវ​ដែល​មាន​ទំហំដ៏​ច្រើនរបស់ខេត្ត មានការពិបាកក្នុងការដឹកជញ្ជូន ហើយបើមា​ន​កំពង់​ផែ​នៅ​ក្នុង​ខេត្ត​ពិត​ជា​បង្ក​លក្ខ​ណៈងាយស្រួលក្នុងការដឹកកសិកផលចេញទៅលក់នៅក្រៅប្រទេស។ដោយសារខេត្តតាកែវជាខេត្តដែលមានសក្ដានុពលខាងវិស័យកសិកម្ម និងការចិញ្ចឹមសត្វ ឯកឧត្តម​អភិបាលខេត្តតាកែវ ក៏បានស្នើអោយ​ក្រុម​ហ៊ុន​ចិន​ចូល​មក​សិក្សា​វិស័យ​ចិញ្ចឹម​សត្វ​ផងដែ​រ ព្រោះនោះ​ខេត្តតាកែវ​ជា​ខេត្ត​មួយ​ដែល​មាន​ការ​ចិញ្ចឹម​សត្វ​ច្រើន​ និង​ជា​ខេត្ត​ដែល​ផ្គត់​ផ្គង់​សាច់​សត្វ​ដល់​ទីផ្សារកម្ពុជាដ៏ធំមួយផងដែរ។

ជាការឆ្លើយតប ក្រុមហ៊ុន Hangxaio Steel Structure របស់ចិន បានយល់ព្រមតាមការស្នើ​សុំរ​បស់​ ភាគីខេត្តតាកែវ ហើយក្រុមហ៊ុននឹងបញ្ជូនតំណាងក្រុមហ៊ុន Hangxaio Steel Structure របស់​ចិនមួយ ចុះមកទស្សនៈកិច្ចសិក្សាដោយផ្ទាល់ នៅក្នុងខេត្តតាកែវ ពិសេសតំបន់​ដែល​ឯកឧត្តម​អភិបាលខេត្ត ស្នើសុំវិនិយោគកំពង់ផែ ៕

សម្របសម្រួលអត្ថបទដោយ៖ ផល្លីកា