បន្ទាប់ពីបានលក់បញ្ចុះតម្លៃទៅលើមុខទំនិញជាច្រើនប្រភេទក្នុងឱកាសពិធីបុណ្យជាតិជាច្រើនសប្តាហ៍រួចមក ឥលូវនេះម្ចាស់ហាងទំនិញធំៗ និងតូចតាចនៅនៅរដ្ឋតិចសាស់ក៏បានបញ្ចុះតម្លៃលើមុខទំនិញរបស់ខ្លួនជាបន្តបន្ទាប់ នៅក្នុងថ្ងៃ Black Friday ដែលម្ចាស់ហាងលក់ទំនិញភាគច្រើនរំពឹងបំបែកកំណត់ត្រាលក់បានច្រើនជាងឆ្នាំមុនៗពីអតិថិជន ។

បើតាមការឲ្យដឹងពីអ្នកវិភាគបានទស្សន៍ទាយ​ថា រដូវកាលលក់បញ្ចុះតម្លៃ Black Friday ក្នុងឆ្នាំនេះ ហាក់មិនសូវមានអតិថិជនច្រើនដូចឆ្នាំមុននោះទេ ដោយអតិថិជនភាគច្រើនស្ថិតនៅក្រោមការគិតគូរពិចារណា និងពិបាកសម្រេចចិត្តជុំវិញឥវ៉ាន់មួយចំនួនមានតម្លៃខ្ពស់បើទោះបីជាបានបញ្ចុះតម្លៃរួចរាល់ក៏ដោយ។ ទោះបីជាយ៉ាងនេះក្តី ក៏មានអតិថិជនមួយចំនួនទៀតកំពុងផ្តោតលើការបញ្ចុះតម្លៃ និងការយល់ដឹង ជាមួយការទិញនូវរបស់របរដែលគេចង់បាន ឬមានតម្រូវការចាំបាច់ដូចជាសម្លៀកបំពាក់ និងឧបករណ៍ប្រើប្រាស់ផ្សេងៗជាដើម។

គួរឲ្យដឹងផងដែរថា Black Friday គឺជាពេលវេលាដ៏ល្អក្នុងការដើរទិញទំនិញបញ្ចុះតម្លៃនៅតាមហាងទំនិញនានា និងបានក្លាយជាពិធីជួបជុំសម្រាកលម្អែសប្បាយរីករាយនៅតាមបណ្ដាប្រទេសមួយចំនួនផងដែរ៕