សេចក្តីប្រកាសរបស់ក្រសួងសុខាភិបាលសិង្ហបុរី នៅថ្ងៃសៅរ៍ ទី ៣០ ខែវិច្ឆិកានេះបានអោយដឹងថា ឧបករណ៍ធ្វើតេស្តរកមេរោគអេដស៍ នឹងមាននៅឱសថស្ថានលក់រាយដែលបានជ្រើសរើសក្នុងប្រទេសសិង្ហបុរី នៅចុងខែមករា ឆ្នាំ ២០២៥ខាងមុខនេះ ដើម្បីជំរុញការធ្វើតេស្ត។ វាជាផ្នែកមួយនៃកិច្ចខិតខំប្រឹងប្រែងដើម្បីបង្កើនលទ្ធភាពទទួលបានការធ្វើតេស្តមេរោគអេដស៍នៅក្នុងសហគមន៍និងលើកទឹកចិត្តឱ្យមានការធ្វើតេស្តជាទៀងទាត់។

 នៅក្នុងសេចក្តីប្រកាសក៏បានបញ្ជាក់ថា ការធ្វើតេស្តរកមេរោគអេដស៍ដោយខ្លួនឯង គឺជាមធ្យោបាយដ៏រហ័ស និងងាយស្រួលដើម្បីស្វែងយល់ពីស្ថានភាពមេរោគអេដស៍ ។ ឧបករណ៍នេះអាចប្រើប្រាស់ដោយឯករាជ្យនៅក្នុងកន្លែងឯកជន និងពាក់ព័ន្ធនឹងការប្រមូលសំណាកមាត់ដោយខ្លួនឯងដោយប្រើឧបករណ៍តេស្ត ។

 ក្រសួងបាននិយាយថា សមាមាត្រដ៏ច្រើននៃអ្នកផ្ទុកមេរោគអេដស៍ដែលទើបរកឃើញថ្មីមានការឆ្លងមេរោគដំណាក់កាលចុងក្រោយនៅពេលធ្វើរោគវិនិច្ឆ័យ ដោយ ៥២ ភាគរយនៃករណីត្រូវបានរកឃើញនៅក្នុងការឆ្លងដំណាក់កាលចុងក្រោយក្នុងឆ្នាំ ២០២៣, ៥១ភាគរយ នៅឆ្នាំ ២០២២ និង ៦២ ភាគរយនៅឆ្នាំ ២០២១ ។

ទោះជាយ៉ាងណាក៏ដោយ លទ្ធផលនៃការធ្វើតេស្តរោគវិនិច្ឆ័យរហ័សតែមួយ ដូចជាឧបករណ៍ធ្វើតេស្តរកមេរោគអេដស៍ដោយខ្លួនឯង គឺមិនគ្រប់គ្រាន់ដើម្បីធ្វើការធ្វើរោគវិនិច្ឆ័យនៃការឆ្លងមេរោគនោះទេ៕