ជនបរទេស ដែលមិនមានឯកសារ និងសិទ្ធរស់នៅត្រឹមត្រូវ ប្រមាណ ៨,៨៧៣នាក់ដែលរស់នៅក្នុងប្រទេសកូរ៉េខាងត្បូង ដោយខុសច្បាប់បានចាកចេញពីប្រទេសក្នុងរយៈពេល ២ខែចុងក្រោយនេះ ក្រោមកម្មវិធីលើកលែងទោសពិសេសរបស់រដ្ឋាភិបាល។ នេះបើយោងតាមក្រសួងយុត្តិធម៌។

អ្នកនាំពាក្យក្រសួងយុត្តិធម៌កូរ៉េខាងត្បូង បានថ្លែងថា «គិតត្រឹមថ្ងៃអង្គារ ជនបរទេសចំនួន ៨,៨៧៣ នាក់ ដែលរស់នៅទីនេះដោយខុសច្បាប់បានត្រឡប់ទៅប្រទេសរបស់ពួកគេវិញ ចាប់តាំងពីថ្ងៃទី៣០ ខែកញ្ញា នៅពេលដែលយុទ្ធនាការរយៈពេលពីរខែ ត្រូវបានចាប់ផ្តើមក្នុងកិច្ចខិតខំប្រឹងប្រែង ដើម្បីកាត់បន្ថយចំនួនអ្នករស់នៅខុសច្បាប់ក្នុងប្រទេស»។

គួរបញ្ជាក់ផងដែរថា អ្នកដែលចាកចេញពីប្រទេសកូរ៉េខាងត្បូង ដោយស្ម័គ្រចិត្តក្រោមកម្មវិធីរដ្ផាភិបាលត្រូវបានលើកលែងពីការបង់ប្រាក់ពិន័យរហូតដល់ ២១,៣០០ដុល្លារ ហើយនឹងត្រូវបានអនុញ្ញាតឱ្យចូលប្រទេសកូរ៉េវិញ បន្ទាប់ពីរយៈពេលជាក់លាក់មួយគឺពី ៣ ទៅ ៦ខែ ផងដែរ៕