សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ផ្ញើសារជូន ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន ចូលរួមសោកស្តាយអំពីគ្រោះរញ្ជួយដីនៅតំបន់ស៊ីហ្សាង សាធារណរដ្ឋប្រជាមានិតចិន។

ខ្លឹមសារលិខិតជាភាសាអង់គ្លេស បកប្រែជាភាសាខ្មែរមានអត្ថន័យបែបនេះថា៖ ឯកឧត្តមប្រធានាធិបតី ជាទីគោរពរាប់អាន! ខ្ញុំមានសេចក្ដីក្រៀមក្រំក្រៃលែង ក្រោយពីបានទទួលដំណឹងអំពីការបំផ្លិចបំផ្លាញយ៉ាងធ្ងន់ធ្ងរ រួមទាំងការបាត់បង់អាយុជីវិតជាច្រើននាក់ ការរងរបួស ការខូចខាតទ្រព្យសម្បត្តិ និងហេដ្ឋារចនាសម្ព័ន្ធ ដែលបណ្ដាលមកពីគ្រោះរញ្ជួយដីនៅតំបន់ស្វយ័តស៊ីហ្សាង ភាគនិរតីនៃសាធារណរដ្ឋប្រជាមានិតចិន។

ក្នុងពេលវេលាដ៏សោកសៅនេះ ក្នុងនាមព្រឹទ្ធសភា នៃព្រះរាជាណាចក្រកម្ពុជា និងខ្លួនខ្ញុំផ្ទាល់ ខ្ញុំសូមចូលរួមរំលែកទុក្ខដ៏ក្រៀមក្រំ និងក្ដីអាណិតអាសូរដោយស្មោះអស់ពីដួងចិត្តចំពោះ ឯកឧត្តម និង តាមរយៈ ឯកឧត្តមជូនដល់គ្រួសារនៃជនរងគ្រោះ រដ្ឋាភិបាល និងប្រជាជននៃសាធារណរដ្ឋប្រជាមានិតចិន សម្រាប់ការបាត់បង់ទាំងនេះ។ ខ្ញុំសូមឧទ្ទិសឱ្យដួងវិញ្ញាណក្ខន្ធអ្នកបាត់បង់ជីវិត បានទៅកាន់សុគតិភព និងសូមជូនពរអ្នករងរបួសឆាប់ជាសះស្បើយឡើងវិញក្នុងពេលឆាប់ៗខាងមុខនេះ។ សូមឯកឧត្តម មេត្តាទទួលនូវការគោរពរាប់អានដ៏ខ្ពង់ខ្ពស់បំផុតពីខ្ញុំ។ ហ៊ុន សែន»។

គួរបញ្ជាក់ផងដែរថា គ្រោះមហន្តរាយរញ្ជួយដីដ៏ខ្លាំងក្លា កម្រិត ៦.៨ រ៉ិចទ័រ បានវាយប្រហារសង្កាត់ឌីនគ្រី (Dingri) ក្នុងទីក្រុងស៊ីហ្គាហ្សិ (Xigaze) ក្នុងតំបន់ស្វយ័តស៊ីហ្សាង (Xizang) នៅម៉ោង ៩៖០៥នាទី កាលពីព្រឹកថ្ងៃអង្គារ ដោយបានសម្លាប់មនុស្សចំនួន ៥៣ នាក់ស្លាប់ និង ៦២នាក់ផ្សេងទៀតទទួលរងរបួសផងដែរ៕