ព្រះរាជអាជ្ញាអមសាលាដំបូងរាជធានីភ្នំពេញ លោក ច្រឹង ខ្មៅ បានទទួលស្គាល់កំហុសដោយអចេតនា ក្រោយបញ្ជាក់ស្លាកលេខ និងម៉ាករថយន្តខុស ក្នុងសេចក្ដីប្រកាសព័ត៌មានពីករណីគ្រោះថ្នាក់ចរាចរណ៍បណ្តាលឲ្យតារាចម្រៀងរ៉េប Ruthko ស្លាប់។

តាមរយៈសារលើបណ្តាញសង្គមរបស់ ព្រះរាជអាជ្ញាអមសាលាដំបូងរាជធានីភ្នំពេញ នៅថ្ងៃទី១០ ខែមករា ឆ្នាំ២០២៥ បានចូលរួមរំលែកទុក្ខដ៏សែនក្រៀមក្រំនេះជាមួយក្រុមគ្រួសារនៃសពលោកដេវិឌ-ឬទ្ធិរុទ្រ (ហៅRuthko) និងអរគុណដល់ម្ចាស់ផេកហ្វេបុកអាចារ្យធំ នគររាជ ដែលបានចង្អុលនូវកំហុសរបស់អ្នកនាំពាក្យអយ្យការរាជធានីភ្នំពេញ។ លោក ច្រឹង ខ្មៅ បានលើកឡើងថា៖«កាន់តែល្អប្រសើរប្រសិនបើអាចារ្យធំបានសាកសួរមុន ដើម្បីអ្នកនាំពាក្យធ្វើការកែកំហុស។ វាជាកំហុសដោយអចេតនាដែលអ្នកដទៃអាចជួយកែសម្រួល រួមទាំងអាចារ្យធំផងដែរ»។ ព្រះរាជអាជ្ញាអមសាលាដំបូងរាជធានីភ្នំពេញ លោក ច្រឹង ខ្មៅ បានបញ្ជាក់ថា កំហុសដោយអចេតនានេះ អ្នកនាំពាក្យអយ្យការភ្នំពេញបានធ្វើការកែសម្រួលរួចហើយ ព្រមទាំងបានបញ្ជាក់បន្ថែមថា ករណីបទល្មើសចរាចរណ៍ជាករណីអាទិភាពដែលអយ្យការបានយកចិត្តទុកដាក់បំផុតក្នុងការចោទប្រកាន់ជនបង្កដែលមានកំហុស និងពុំអាចរួចខ្លួននៅពេលបានសងសំណងដល់ជនរងគ្រោះនោះទេ ព្រមទាំងពិនិត្យលើសេចក្តីសម្រេចរបស់តុលាការអំពីទោសដែលផ្តន្ទាដើម្បីអនុវត្តសិទ្ធិប្តឹងឧទ្ធណ៍ប្រសិនបើការសម្រេចដាក់ទោសស្រាលពេក។ លោក ច្រឹង ខ្មៅ សំណូមពរដល់សាធារណជនគួរជៀសវាងរំលេចពាក្យពេចន៍លើបណ្តាញសង្គមនាំឲ្យមានការយល់ច្រឡំ មានការជេរប្រមាថបុគ្គល ឬស្ថាប័ន និងដែលអាចនាំឲ្យមានការទទួលខុសត្រូវតាមផ្លូវច្បាប់។

សម្រួលអត្ថបទដោយ៖ ផល្លីកា