ក្រោយផ្ទុះការវែកញែក និងប្រតិកម្មខ្លាំងពេញបណ្ដាញសង្គមទៅលើវីដេអូឃ្លីបមួយរបស់អ្នកលក់ផ្កាមួយកន្លែងបានបង្ហោះផ្សព្វផ្សាយសកម្មភាពរៀបចំផ្កា ដោយក្នុងនោះមានជាប់ជាមួយស៊ុមផ្កាមានរូបថតរបស់ លោក Ruthko ដែលចំនុចត្រង់នេះហើយបានធ្វើឲ្យមហាជនប្រតិកម្មហួសចិត្ត ស្របពេលដែលក្រុមគ្រួសារគេកំពុងតែកាន់ទុក្ខបែបជាថតជាប់រូប លោក Ruthko មកផ្សព្វផ្សាយទីផ្សារដើម្បីអាជីវកម្មរបស់ខ្លួនទៅវិញ។

បន្ទាប់មកដោយមានការរិះគន់ និងប្រតិកម្មច្រើនពីសំណាក់មហាជនម្ចាស់ហាងលក់ផ្កានោះក៏បានលុបនូវវីដេអូនោះចេញវិញ ព្រមទាំងបានបញ្ចេញជាសារសុំទោសទៅកាន់ក្រុមគ្រួសារ លោក Ruthko នូវទង្វើរមិនគប្បីដោយអចេតនានេះ តែយ៉ាងណាមិញក្រោយរៀបចំបុណ្យសពកូនប្រុសរួចរាល់ម្ដាយរបស់ លោក Ruthko ក៏បានប្រកាសថានឹងចាត់វិធានការតាមផ្លូវច្បាប់ទៅលើកម្ចាស់ហាងលក់ផ្កានោះ ព្រោះនេះជាការប្រមាថជីវិតកូនប្រុសខ្លួនយ៉ាងខ្លាំង។

នេះបើយោងតាមគណនីឈ្មោះ Coromac Cam ដែលត្រូវជាម្ដាយរបស់ លោក Ruthko បានប្រកាសបែបនេះថា៖ «ខ្ញុំជាម្ដាយនិងគ្រួសាររបស់សពនិងមិនទទួលការសុំទោសជាដាច់ខាត ហាងផ្កានឹងត្រូវទទួលខុសត្រូវជាមួយគ្រួសាខ្ញុំផ្លូវច្បាប់ កូនខ្ញុំស្លាប់ហើយ អត់បានចុះកិច្ចសន្យាធ្វើ BA លក់ផ្កាទេ ហេតុអ្វី​ហ៊ានប្រមាថជិវិតកូនខ្ញុំនិងគ្រួសារខ្ញុំក្នុងពេលពួកយើងកំពុងឈឺចាប់បែបនេះ»៕