មហាជនអ្នកនិយមលេងបណ្តាញសង្គមកំពុងផ្ទុះការិះគន់ទៅលើវីដេអូឃ្លីបមួយដែលបានបង្ហាញអ្នកលក់អនឡាញម្នាក់បានចេញទៅចូលរួមពិធីមង្គលការ ដោយមានហែរហមដោយរថយន្តទំនើបៗជាច្រើនគ្រឿង ហើយថែមទាំងមានរថយន្តពាក់ផ្លាកលេខខេមរភូមិន្ទលេខ ២-១៨៧១ បើកផ្លូវឱ្យផងដែរ។ 

វីដេអូឃ្លីបនោះ ត្រូវបានចែករំលែកលើបណ្ដាញសង្គម ដោយមហាជនបានរិះគន់ទៅលើការយករថយន្តស្ថាប័នប្រដាប់អាវុធដើម្បីបើកផ្លូវឱ្យឯកជននេះថា ការធ្វើបែបនេះធ្វើឱ្យប៉ះពាល់ដល់មុខមាត់ស្ថាប័នជាតិ និងគួរចាត់វិធានការទៅតាមផ្លូវច្បាប់ ។

បន្ទាប់ពីមានការរិះគន់ពីសំណាក់មហាជនជាច្រើនហូរហែ មេបញ្ជាការកងរាជអាវុធហត្ថលើផ្ទៃប្រទេសនាយឧត្តមសេនីយ៍ សៅ សុខា បានបញ្ជាឱ្យចាប់រថយន្តសារ៉ែនដែលបើកផ្លូវឱ្យអ្នកលក់អនឡាញម្នាក់ឱ្យបាន ដោយថាការមិនដឹងច្បាប់ទម្លាប់ធ្វើឱ្យប៉ះពាល់ខ្លាំងដល់កងទ័ពជាតិ។ នាយឧត្តមសេនីយ៍ សៅ សុខា បានបញ្ជាឱ្យអាវុធហត្ថធ្វើការជាមួយអគ្គនាយកដ្ឋានបច្ចេកទេសក្រសួងការពារជាតិស្រាវជ្រាវលេខរថយន្តដែលបើកផ្លូវឱ្យអ្នកលក់អនឡាញនេះថាបំពាក់ឱ្យអង្គភាពណាមួយ និងបញ្ជាឱ្យតាមរកឃាត់ទុកតែម្ដង៕