លោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី បានបង្ហោះសារមួយយ៉ាងចាក់ដោតទៅកាន់អ្នកជំនួញអនឡាញដ៏ល្បី Love Riya ក្រោយបានឃើញមួយរយៈពេលចុងក្រោយនេះ នាងតែងតែតាំងខ្លួនជាបារមីនេះកាន់ បារមីនោះកាន់ និងបានតាំងខ្លួនជាមហេសីព្រះបាទជ័យវរម្មន័ទី៧លេងសើច ដើម្បីទាក់ទាញ់ចំណាប់អារម្មណ៍មហាជនរួចលក់ផលិតផល។

ក្នុងនោះ លោកជំទាវ ញ៉ែម មរកត បានលើកឡើងថា៖ «ប្រកបមុខរបរដោយសេរីភាពពេញលេញ រកស៊ីលក់ដូររីកចម្រើនហើយ បែជាយកកិត្តិនាមវិរៈក្សត្រ វិរៈក្សត្រី តួអង្គជាច្រើនទៀតដែលមានស្នាដៃល្បីល្បាញពេញពិភពលោកមកលេងសើចសម្រាប់លក់ផលិតផលទៅវិញ ?? ខ្ញុំគាំទ្រប្រសាសន៍ណែនាំរបស់លោកជំទាវឧកញ៉ា ហ៊ុន ស៊ីណាត ដែលជាចាស់ទុំ ។

ប្រហែល២០ឆ្នាំមកហើយ ខ្ញុំនិងលោកស្រី ផល្លីកា បានស្រាវជ្រាវប្រវត្តិមហេសីទាំង២អង្គរបស់ព្រះបាទជ័យវរម្មន័ទី៧ ចងក្រងជាសៀវភៅ គឺជាស្ត្រីដ៍អស្ចារ្យជួយស្វាមី ការពារជាតិ ទឹកដី លើកស្ទួយវិស័យសេដ្ឋកិច្ច អប់រំ សាសនា ។ល។ មិនមែនជាចរិត និងសកម្មភាពរហេចរហាចដូចអ្នកលក់ផលិតផលខ្លះនោះទេ ហេតុនេះប្អូនៗកុំយកព្រះនាមអតីតមហាវិរក្សត្រ និងតាំងខ្លួនជាតួរអង្គព្រះមហេសីវិរៈបុរសជំនាន់មុនមកតាំងជារូបខ្លួនចាប់ជាតិ ឬដឹងជាតិកំណើតទៀតវាមិនអាចទៅរួចទេ គ្រាន់តែគោរពប្រតិបត្តិគឺមិនខុសឡើយ។ រកស៊ីធម្មតាៗទៅបានសុខ និងមានកិត្តិយសគ្រប់គ្រាន់ហើយ»។

បន្ថែមពីនេះ រំលងបាន១ថ្ងៃ នាព្រឹកថ្ងៃទី០៤ ខែកុម្ភៈ ឆ្នាំ២០២៥នេះ លោកជំទាវ ក៏បានបង្ហោះសំណេរមួយបន្ថែមទៀតថា៖ «ក្រោយលោកជំទាវ ហ៊ុនស៊ីណាត លោកឡាយ មុននេះខ្ញុំបានយកសៀវភៅស្រាវជ្រាវពីបដិមាដែលឆ្លាក់នៅអង្គរវត្ត និងប្រវត្តិមហេសីទាំងពីររបស់ព្រះបាទជយ័វ័រ្មនទី៧មកមើល។ លោកជំទាវស្រែកប្រដៅមិនខុសទេ រកស៊ីកុំចេះតែបែកឆ្វេងតាំងខ្លួនជាបារមីនេះ បារមីនោះកាន់.. ដើម្បីផលប្រយោជន៍ក្រុមខ្លួនហើយមកបន្ទាបបន្ថោកកិត្យានុភាពជាតិ សាសនា វិរៈបុរស វិរៈស្ត្រីជាដូនតាជំនាន់មុន វាមិនអាចទៅរួចទេ។ប្អូនដែលតាំងខ្លួនជាមហេសីព្រះអង្គត្រៀមខ្លួនទៅព្រោះឮថាក្រសួងពាក់ពន្ធ័នឹងអញ្ជើញទៅបង្ហាញខ្លួនឆាប់ៗហើយ»៕ សម្រួលដោយ៖ Sun Darasy