រដ្ឋមន្ដ្រីក្រសួងពាណិជ្ជកម្ម លោកជំទាវ ចម និម្មល បានអញ្ជើញដឹកនាំគណៈប្រតិភូកម្ពុជា ជួបពិភាក្សាការងារទ្វេភាគីជាមួយឯកឧត្តមបណ្ឌិត Hisham bin Saad Aljadhey នាយកប្រតិបត្តិនៃអាជ្ញាធរចំណីអាហារ និងឱសថរបស់អារ៉ាប៊ីសាអូឌីត (Saudi Food and Drug Authority)។ក្នុងឱកាសបំពេញទស្សនកិច្ចផ្លូវការនៅព្រះរាជាណាចក្រអារ៉ាប៊ីសាអូឌីត និងចូលជួបពិភាក្សាការងារជាមួយ នាយកប្រតិបត្តិនៃអាជ្ញាធរចំណីអាហារ និងឱសថរបស់អារ៉ាប៊ីសាអូឌីត នាព្រឹកថ្ងៃពុធ ទី៥ ខែកុម្ភៈ ឆ្នាំ២០២៥ លោកជំទាវ ចម និម្មល បានលើកទឹកចិត្តភាគីអារ៉ាប៊ីសាអូឌីត ឲ្យពិចារណាលើការវិនិយោគកែឆ្នៃផលិតផលហាឡាល់ សម្រាប់ការនាំចេញ។ក្នុងជំនួបនេះ ភាគីទាំងពីរបានពិភាក្សាពីការពង្រឹងកិច្ចសហប្រតិបត្តិការលើវិស័យសុវត្ថិភាព និងស្តង់ដារម្ហូបអាហារ ឱសថ និងរបស់ប្រើប្រាស់។ 

គួរឲ្យដឹងដែរថា នៅក្នុងប្រទេសកម្ពុជា ប្រជាជនក្នុងស្រុកប្រមាណ ២ ភាគរយកាន់សាសនាឥស្លាម ដែលនាំឲ្យមានតម្រូវការអាហារហាឡាល និងផលិតផលហាឡាលផ្សេងទៀត៕

សម្រួលអត្ថបទដោយ៖ ផល្លីកា