ស្តូបលោកតាឌីដែលស្ថិតនៅបរិវេណសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ ក្នុងខេត្តព្រះវិហា បានជួសជុលរួចរាល់ជាស្ថាពរ និងដាក់ជូនសាធារណជនប្រើប្រាស់ចាប់ពេលនេះតទៅ។

អាជ្ញាធរជាតិព្រះវិហារ បានបញ្ជាក់ឱ្យដឹងនៅថ្ងៃទី១១ ខែកុម្ភៈ ឆ្នាំ២០២៥ នេះថា ការងារថែទាំ និងជួសជុលស្តូបលោកតាឌី នៅបរិវេណសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារបានប្រើរយៈពេលមួយខែដោយអនុវត្តចាប់ពីថ្ងៃទី១០ ខែមករា ដល់ថ្ងៃទី១០ ខែកុម្ភៈដោយក្រុមការងារនាយកដ្ឋានគ្រប់គ្រងដីធ្លី នគរូបនីយកម្ម និងអភិវឌ្ឍន៍សហគមន៍នៃអាជ្ញាធរជាតិព្រះវិហារ។ ក្រុមការងារបានជួសជុល និងកែលម្អស្តូបលោកតាឌីនៅផ្នែកមួយចំនួនដែលមានភាពពុកផុយ ស្លកពណ៌ថ្នាំ និងជ្រាបទឹកតាមដំបូល ក្នុងនោះបានរុះរើដំបូលក្បឿង ដើម្បីសម្អាតឡើងវិញ និងលាបថ្នាំការពារជម្រាបទឹកនៅពិដានបេតុង។ រុះរើដៃរណែងដែលច្រេះ និងផ្លាស់ប្តូរថ្មី ក្រាលស័ង្កសីលាតនៅផ្នែកខាងក្រោមដំបូលក្បឿងស្រកាលិញក្នុងន័យបង្កើនការបង្ការទឹកស្រក់ ឬជ្រាបពីដំបូល។ ពង្រឹងគ្រឹះនិងរៀបឥដ្ឋកន្សែងព័ន្ធជុំវិញដើម្បីការពារការហូរច្រោះដីគ្រឹះ លាបថ្នាំពណ៌ថ្មីនៅផ្នែកពិដាន និងនៅខឿនក្បាច់ខាងក្រោមទាំងអស់ឡើងវិញ។

ចាប់ពីថ្ងៃទី១១ ខែកុម្ភៈតទៅស្តូបលោកតាឌីដែលស្ថិតនៅបរិវេណសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ ត្រូវបានអនុញ្ញាតឱ្យសាធារណជនចូលគោរពបូជា និងទស្សនាដោយសេរី៕