ប្រធានាធិបតីស្តីទីកូរ៉េខាងត្បូង លោក Han Duck-soo បាននិយាយក្នុងអំឡុងកិច្ចប្រជុំគណៈរដ្ឋមន្ត្រីនៅថ្ងៃអង្គារនេះថា លោករំពឹងថា កិច្ចពិភាក្សាពាណិជ្ជកម្មក្នុងសប្តាហ៍នេះជាមួយសហរដ្ឋអាមេរិកនឹងត្រួសត្រាយផ្លូវឆ្ពោះទៅរកដំណោះស្រាយដែលមានផលប្រយោជន៍ទៅវិញទៅមក។

រដ្ឋមន្ត្រីហិរញ្ញវត្ថុ Choi Sang-mok និងរដ្ឋមន្ត្រីឧស្សាហកម្ម Ahn Duk-geun នឹងចូលរួមកិច្ចប្រជុំរួមគ្នាជាមួយរដ្ឋមន្ត្រីក្រសួងរតនាគារសហរដ្ឋអាមេរិក Scott Bessent និងតំណាងពាណិជ្ជកម្មអាម៉េរិក Jamieson Greer នៅថ្ងៃទី ២៤ ខែមេសា នៅទីក្រុងវ៉ាស៊ីនតោន វេលាម៉ោង ៨ ព្រឹកម៉ោងក្នុងស្រុក។លោក Han បាន​និយាយ​ថា កិច្ច​ប្រជុំ​ត្រូវ​បាន​កំណត់​ពេល​តាម​សំណើ​របស់​សហរដ្ឋ​អាមេរិក។

លោក Choi បានប្រាប់អ្នកយកព័ត៌មាននៅឯអាកាសយានដ្ឋានទីក្រុងសេអ៊ូលមុនការចេញដំណើររបស់លោកនៅថ្ងៃអង្គារថា លោកមានបំណងត្រលប់មកវិញ បន្ទាប់ពីបើកកិច្ចពិភាក្សាដែលនឹងពង្រឹងសម្ព័ន្ធភាពរវាងកូរ៉េខាងត្បូង និងសហរដ្ឋអាមេរិក។ រដ្ឋមន្ត្រីក្រសួងឧស្សាហកម្មនឹងត្រូវចាកចេញនៅថ្ងៃពុធនេះ៕