ក្រុមការងារនៃអាជ្ញាធរជាតិអប្សរាបានបញ្ចប់ជួសជុលរចនាសម្ពន្ធទបង្ហូរទឹកនៅទិសខាងលិចនៃប្រាសាទនាគព័ន្ធដោយជោគជ័យ។

បើតាមបុគ្គលិកបច្ចេកទេស នាយកដ្ឋានអភិរក្សប្រាសាទនិងបុរាណវិទ្យា នៃអាជ្ញាធរជាតិអប្សរា លោក អ៊ិច ស្រេង បានមានប្រសាសន៍ថា រចនាសម្ព័ន្ធរបស់ទបង្ហូរទឹកនៅទិសខាងលិចនៃប្រាសាទនាគព័ន្ធបានប្រែក្លាយពីការខូចខាតទៅជាមានភាពរឹងមាំ និងមានសោភ័ណភាពឡើងវិញ។ រចនាសម្ព័ន្ធទបង្ហូរទឹករបស់ប្រាសាទនាគព័ន្ធ បានរងការខូចខាតជាច្រើនកន្លែងដោយសារតែកត្តាអាយុកាល ទឹកហូរច្រោះ និងរុក្ខជាតិដុះចាក់ឬសចូលសំណង់។

លោក អ៊ិច ស្រេង បញ្ជាក់ទៀតថា ក្រុមការងារជំនាញនៃអាជ្ញាធរជាតិអប្សរា ធ្លាប់បានជួសជុលរចនាសម្ព័ន្ធទបង្ហូរទឹករបស់ប្រាសាទនាគព័ន្ធ ចំនួន២ទីតាំងរួចមកមកហើយ។ ទី១. គឺរចនាសម្ព័ន្ធទបង្ហូរទឹកនៅទិសខាងកើត និងទីតាំងទី២ រចនាសម្ព័ន្ធទបង្ហូរទឹកនៅទិសខាងជើង។

ជាមួយគ្នានេះលោកបានរំពឹងថា បន្ទាប់ពីការជួសជុលរចនាសម្ពន្ធទបង្ហូរទឹករបស់ប្រាសាទនាគព័ន្ធ ដែលធ្លាប់តែរងហានិភ័យ គឺរចនាសម្ពន្ធទាំងនោះ នឹងមានភាពរឹងមាំ មានសោភ័ណភាព ព្រមទាំងមានភាពទាក់ទាញឱ្យអ្នកទេសចរអាចទៅទស្សនាកើនឡើងផងដែរ៕