អាជ្ញាធរបាននិយាយកាលពីថ្ងៃទី ១៤ ខែឧសភាថា អ្នកមានឥទ្ធិពលលើប្រព័ន្ធផ្សព្វផ្សាយសង្គមម៉ិកស៊ិកម្នាក់ត្រូវបានបាញ់សម្លាប់ក្នុងអំឡុងពេលផ្សាយផ្ទាល់នៅលើ TikTok ដែលនាងមានអ្នកតាមដានរាប់ម៉ឺននាក់។ Valeria Marquez អាយុ ២៣ ឆ្នាំ ដែលបានបង្ហោះវីដេអូទាក់ទងនឹងសម្រស់ និងរបៀបរស់នៅ ដែលខ្លះមានអ្នកចូលមើលរាប់សែនដង។

ការិយាល័យរដ្ឋអាជ្ញារដ្ឋ Jalisco បានរាយការណ៍ថា Valeria Marquez ត្រូវបានគេបាញ់សម្លាប់ចំទ្រូងមួយគ្រាប់និងក្បាលមួយគ្រាប់ បណ្តាលឲ្យដួលស្លាប់ភ្លាមៗកាលពីល្ងាចថ្ងៃអង្គារនៅឯហាងកែសម្ផស្សរបស់នាងនៅតំបន់ Zapopan ជាយក្រុងនៃទីក្រុង Guadalajara ភាគខាងលិចប្រទេសម៉ិកស៊ិក ។ ជនរងគ្រោះគឺជាតារាម៉ូឌែលដែលមានភាពល្បីល្បាញ និងមានឥទ្ធិពលនៅលើប្រព័ន្ធផ្សព្វផ្សាយសង្គមមួយរូប។​ ចំពោះមូលហេតុ​នៃ​ការ​វាយ​ប្រហារ​នេះ​មិន​ត្រូវ​បាន​គេ​ដឹង​​នៅឡើយ​ទេ។

គួរបញ្ជាក់ថា តំបន់ Zapopan គឺជាកន្លែងរសើបនៃសកម្មភាពឧក្រិដ្ឋកម្មដែលជាកន្លែងរបស់ក្រុមជួញដូរគ្រឿងញៀនដ៏ឃោរឃៅបំផុតមួយរបស់ប្រទេសម៉ិកស៊ិកគឺក្រុម Jalisco New Generation Cartel ។ ទោះបីជាយ៉ាងណារហូតមកដល់ពេលនេះ ក្រុមអ្នកស៊ើបអង្កេតមិនបានរកឃើញភស្តុតាងណាមួយដែលថាក្រុមឧក្រិដ្ឋជននៅពីក្រោយការបាញ់ប្រហារនោះទេ៕