ពិធីការិនីប្រចាំទូរទស្សន៍បាយ័ន អ្នកនាង ហ៊ិន ច័ន្ទនីរ័ត្ន និងស្វាមី បានរៀបចំកម្មវិធីទស្សទាយបង្ហាញពីភេទកូនរបស់អ្នកទាំងពីរជាផ្លូវការយ៉ាងអធិកអធម ប្រកបដោយស្នាមញញឹម កាលពីយប់ថ្ងៃទី ១៨ ខែ ឧសភា ឆ្នាំ ២០២៥ ក្រោយរង់ចាំដល់គភ៌មានអាយុ ៧ ខែទើបសម្រេចចិត្តបើបង្ហាញ ដោយលទ្ធផលគឺទទួលបានកូនប្រុសដូចបំណង។

ក្នុងវេលាដ៏សែនរំភើបនេះអ្នកនាង ហ៊ិន នីរ័ត្ន និងស្វាមី រៀបចំកម្មវិធីឡើងយ៉ាងធំ មិនត្រឹមតែប៉ុណ្ណោះក៏មានការ Live ផ្ទាល់ពីទិដ្ឋភាពក្នុងកម្មវិធីចែករំលែកដល់បណ្ដាអ្នកគាំទ្របានទស្សនា ដោយកម្មវិធីនេះយើងសង្គេតឃើញថាមានការចូលរួមយ៉ាងច្រើនកុះករ ពោពេញទៅដោយសំឡេងហ៊ោកញ្ច្រៀវទះដៃពីសំណាក់មិត្តក្នុងរង្វង់សិល្បៈ ក៏ដូចជាញាតិមិត្តជាច្រើនដែលបានផ្ដល់កិត្តិយសអញ្ជើញចូលរួម និងបានចូលរួមទស្សទាយពីភេទកូនទៅតាមការយល់ឃើញរៀងៗខ្លួន បន្ថែមពីនេះសម្រាប់អ្នកទាយត្រូវនឹងទទួលបានរង្វាន់ថែមទៀតផង។

គួរបញ្ជាក់ផងដែរ ថាអ្នកនាង នីរ័ត្ន និងស្វាមី លោក ឌី ពេជ្រ ពីមួយថ្ងៃមួយតែងតែបង្ហាញភាពផ្អែមល្ហែមក្នុងបណ្ដាញសង្គម ពិសេសនៅពេលភរិយាមានទម្ងន់ពពោះកូនដំបូង ដែលជាកូនប្រុសស្វាមីប្រាថ្នាចង់បាននោះ គឺស្វាមីពិធីការិនីរូបនេះតែងតែយកចិត្តទុកដាក់គ្រប់ជំហ៊ាន ធ្វើឲ្យហ្វេនៗមិត្តនារីជាច្រើនលួចច្រណែនផងដែរ៕ អត្ថបទដោយ៖ Sun Darasy