ក្រុមអ្នកជួយសង្គ្រោះបានស្វែងរកកាលពីថ្ងៃសៅរ៍ ក្មេងស្រីចំនួន ២៧ នាក់ដែលបាត់ខ្លួនពីជំរុំរដូវក្តៅមាត់ទន្លេក្នុងរដ្ឋតិចសាស់របស់សហរដ្ឋអាមេរិក បន្ទាប់ពីភ្លៀងធ្លាក់ខ្លាំងបានបណ្តាលឱ្យមានទឹកជំនន់និងបានសម្លាប់មនុស្សយ៉ាងហោចណាស់ ៤៣ នាក់ ជាមួយនឹងភ្លៀងធ្លាក់បន្ថែមទៀតនៅក្នុងតំបន់។

លោក Larry Leitha ស្នងការរងខេត្ត Kerr បាននិយាយថា យើងបានរកឃើញអ្នកស្លាប់ចំនួន ៤៣ នាក់នៅក្នុងតំបន់ County Kerr ។ ក្នុងចំណោមអ្នកស្លាប់ទាំងនេះ មានមនុស្សពេញវ័យ ២៨នាក់ និងកុមារ ១៥ នាក់ ។ ថ្លែងក្នុងសន្និសីទសារព័ត៌មានមុននេះ អភិបាលរដ្ឋតិចសាស់ លោក Greg Abbott បាននិយាយថា លោកកំពុងពង្រីកការប្រកាសគ្រោះមហន្តរាយរដ្ឋ និងកំពុងស្នើសុំធនធានសហព័ន្ធបន្ថែមពីប្រធានាធិបតីអាមេរិក Donald Trump ។ ប្រធាននាយកដ្ឋានគ្រប់គ្រងគ្រាអាសន្នរដ្ឋតិចសាស់ លោក Nim Kidd បាននិយាយថា ក្រុមនាវិកតាមអាកាស ដី និងទឹកកំពុងរុករកតាមដងទន្លេ Guadalupe សម្រាប់អ្នកនៅរស់រានមានជីវិត និងសពអ្នកស្លាប់។

ទឹកជំនន់បានចាប់ផ្តើមកាលពីថ្ងៃសុក្រ ខណៈដែលភ្លៀងធ្លាក់អស់ជាច្រើនខែក្នុងរយៈពេលត្រឹមតែប៉ុន្មានម៉ោងប៉ុណ្ណោះ ដែលបណ្តាលឱ្យទឹកទន្លេ Guadalupe កើនឡើង៨ ម៉ែត្រក្នុងរយៈពេល ៤៥ នាទី។សេវាអាកាសធាតុជាតិបានព្រមានថា នឹងមានភ្លៀងធ្លាក់កាន់តែច្រើន ហើយថាទឹកហូរខ្លាំងពេកអាចបណ្តាលឱ្យមានការជន់លិចទន្លេ ព្រែក អូរ និងទីតាំងទំនាបផ្សេងទៀត និងងាយរងគ្រោះដោយទឹកជំនន់៕