ពិធីករទូរទស្សន៍ដ៏ល្បី លោក តាប៊ុយ ត្រូវបានមហាជនរិះគន់យ៉ាងចាស់ដៃ ខណៈចុះសម្ភាសន៍សួរសំណួរមួយចំនួនបែបលេងសើច បែជាត្រូវបានបណ្ដាអ្នកលេងបណ្ដាញសង្គមជាច្រើនយល់ថាជាការបំបាក់មុខពេបជ្រាយដល់លោកពូលក់ស្ករទាញមួយរូប ដែលកំពុងតែផ្ទុះការគាំទ្រខ្លាំង ហើយអ្វីដែលកាន់តែធ្វើឲ្យគ្រប់គ្នាហួសចិត្តនោះ គឺបន្ទាប់ពីពិធីកររូបនេះសម្ភាសន៍ចប់ចុងក្រោយ គឺលោកបានជូនថវិកាចំនួន ៥ដុល្លារប៉ុណ្ណោះ ទៅលោកពូដែលជាអ្នកលក់ស្ករទាញទៅវិញ។

ដោយបានមើលឃើញទង្វើមិនសមរម្យបែបនេះ បុគ្គលមួយរូបដែលមានឈ្មោះល្បីក្នុងបណ្ដាញសង្គមដែលគ្រប់គ្នាតែងហៅថា(ចំប៉ីខ្មៅ)បានចេញមុខព្រឡះចំៗទៅកាន់ពិធីករសង្ហាររូបនោះយ៉ាងដូច្នេះថា៖ «Taboi Kh លើកក្រោយបើអត់មានលុយឱ្យគាត់ទេឆាតមកខ្ចីម៉ាក់ចំប៉ីបានត្រឹម 100$ 200$ បាញ់ឱ្យភ្លាមៗ សំភាសន៍គេលើកក្រោយឱ្យគេ ម្នាក់100$ទៅ» បន្ថែមពីនេះលោកក៏បានបន្តនៅក្នុងខមិនថា៖ «ចូលចិត្តភាពស្មោះត្រង់មិនកេងកម្លាំងគេ ក្នុងនាមអ្នកអាជីវកម្មម្នាក់ ជាពិសេសជាអ្នកប្រម៉ូត គួរណាស់ តែមានកញ្ចប់សម្រាប់អ្នកដែលខ្លួនចុះទៅសម្ភាសន៍ មិនគួរណាឱ្យ5$ ហើយយករូបឡេមកផុស ធ្វើឱ្យខ្លួនឯងទទួលបានប្រជាប្រិយភាព អាចប្រម៉ូតផលិតផលបាន លុយពីក្រុមហ៊ុន ឬ agency តែអ្នកដែលខ្លួនប្រម៉ូតបែរជា ទទួលបាន 5$ និងការអាម៉ាស់ ដែលមើលទៅហាក់ដូចជាមានគម្លាតរវាងអ្នកមាន និងអ្នកក្រ»។

យ៉ាងណាមិញជុំវិញរឿងរ៉ាវដ៏ក្ដៅគគុកដែលមហាជនកំពុងតែប្រតិកម្ម និងវែងញែកនេះ យើងសង្គេតឃើញថា ពិធីករលោក តាប៊ុយ ក៏បានបង្ហោះសំណេរសុំចិត្តមហាជនថា៖ «ខ្ញុំបាទសូមទោសប្រសិនបើការសំភាសន៍ ឬcaptionក៏ដូចជាវីដេអូណាមួយ មានចំនុចមិនសមរម្យ សង្ឃឹមថាពុកម៉ែបងប្អូននឹងមិនប្រកាន់ហើយនៅតែគាំទ្រខ្ញុំបាទ»៕