យោងតាមរបាយការណ៍របស់អាជ្ញាធរវៀតណាមនៅថ្ងៃទី ៤ ខែវិច្ឆិកា ឆ្នាំ ២០២៥ បានឲ្យដឹងថា ចំនួនអ្នកស្លាប់ដោយសារទឹកជំនន់ និងភ្លៀងធ្លាក់ខ្លាំងនៅភាគកណ្តាលប្រទេសវៀតណាមបានកើនឡើងដល់ ៤០ នាក់ ។ ទឹកជំនន់នេះបណ្តាលមកពីភ្លៀងធ្លាក់ខ្លាំងជាប់ៗគ្នារយៈពេលមួយសប្តាហ៍ ដោយតំបន់ខ្លះទទួលបានទឹកភ្លៀងរហូតដល់ ១,៧ ម៉ែត្រក្នុងរយៈពេល ២៤ ម៉ោង ។ ការស្លាប់នេះបានកើតឡើងនៅក្នុងខេត្តជាច្រើន រួមមានទីក្រុងហៀវ ដាណាង ឡាំដុង និងក្វាងទ្រី ដោយមនុស្ស ៦ នាក់នៅតែបាត់ខ្លួន។

ទឹកជំនន់បានបំផ្លាញផ្ទះជាង ១០០ ខ្នង និងខូចខាតរាប់រយខ្នងទៀត លិចផ្ទះជិត ៨០,០០០ ខ្នង និងបំផ្លាញដំណាំជាង ១០,០០០ ហិកតា។ គោក្របីជាង ៦៨,០០០ ក្បាលក៏បានបាត់បង់ផងដែរ។ ផ្លូវជាច្រើននៅតែបិទដោយសារការរអិលបាក់ដី ដែលធ្វើឱ្យតំបន់ខ្លះដាច់ស្រយាល ហើយគ្រួសារជាង ១៦០,០០០ គ្រួសារគ្មានអគ្គិសនីប្រើប្រាស់។ កិច្ចខិតខំប្រឹងប្រែង​ជួយសង្គ្រោះ និង​ផ្តល់ជំនួយ​កំពុង​បន្ត​ធ្វើ ខណៈដែល​រដ្ឋាភិបាល និង​អង្គការ​ជំនួយ​កំពុង​ធ្វើការ​ដើម្បី​ជួយ​សហគមន៍​ដែល​រងផលប៉ះពាល់។

គួរបញ្ជាក់ផងដែរថា ព្យុះទីហ្វុង Kalmaegi ធ្វើដំណើរឆ្លងកាត់ប្រទេសហ្វីលីពីន នៅជិតទីក្រុងសេប៊ូ ហើយឆ្លងកាត់សមុទ្រចិនខាងត្បូង ខិតជិតឆ្នេរសមុទ្រវៀតណាម ដែលនឹងបោកបក់មកដល់ដីគោកក្នុងពេលឆាប់ៗនេះ ជាមួយនឹងល្បឿនខ្យល់រហូតដល់ ១៦៦ គីឡូម៉ែត្រក្នុងមួយម៉ោង ដែលគំរាមកំហែងដល់ស្ថានភាពកាន់តែអាក្រក់ទៅៗ។ យ៉ាងណាមិញ ប្រទេសកម្ពុជាក៏ស្ថិតនៅក្បែរគន្លងផ្លូវដើររបស់ព្យុះ Kalmaegi ទទួលរងឥទ្ធិពលកម្រិត៣០%ផងដែរ៕