អ្នកនាំពាក្យក្រសួងការបរទេសចិន លោក Guo Jiakun បានឲ្យដឹងថា ទាំងកម្ពុជា និងថៃ គឺជាសមាជិកសំខាន់ៗរបស់អាស៊ាន។ ប្រទេសចិនកោតសរសើរ និងគាំទ្រកិច្ចខិតខំប្រឹងប្រែងរបស់អាស៊ាន ជាពិសេស ម៉ាឡេស៊ី ដើម្បីធានាសន្តិភាព។

លោក Guo Jaikun បញ្ជាក់ថា ប្រទេសចិន ក្នុងនាមជាមិត្ត និងជាអ្នកជិតខាងជិតស្និទ្ធរបស់ប្រទេសទាំងពីរ សង្ឃឹមយ៉ាងមុតមាំថា ការប្រយុទ្ធគ្នានឹងបញ្ឈប់ ហើយសន្តិភាពនឹងត្រូវបានកសាងឡើងវិញក្នុងពេលឆាប់ៗនេះ ដែលជាផលប្រយោជន៍ធំជាងសម្រាប់សន្តិភាព និងស្ថិរភាពតាមបណ្តោយព្រំដែនរបស់ពួកគេ និងផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរ។

អ្នកនាំពាក្យរូបនេះបញ្ជាក់ទៀតថា ចាប់តាំងពីការកើនឡើងនៃភាពតានតឹងចុងក្រោយរវាងប្រទេសទាំងពីរ ប្រទេសចិនបាន និងកំពុងចូលរួមជាមួយភាគីទាំងពីរ ដើម្បីសន្តិភាពតាមរយៈមធ្យោបាយផ្ទាល់ខ្លួន ដោយរដ្ឋមន្ត្រីការបរទេស លោក Wang Yi បាននិយាយជាមួយរដ្ឋមន្ត្រីការបរទេសកម្ពុជា និងថៃតាមទូរស័ព្ទ។ មន្ត្រីជាន់ខ្ពស់ក្រសួងការបរទេសបានរក្សាទំនាក់ទំនងជាមួយកម្ពុជា ថៃ និងប្រទេសអាស៊ានពាក់ព័ន្ធ។ លោក Deng Xijun បេសកជនពិសេសក្រសួងការបរទេសទទួលបន្ទុកកិច្ចការអាស៊ី កំពុងធ្វើដំណើរតាមផ្លូវការទូតដើម្បីសម្រួលដល់ការចរចា។ នៅក្នុងដំណើរតាមផ្លូវការទូតរបស់លោក ព័ត៌មានពាក់ព័ន្ធនឹងត្រូវបានចេញផ្សាយនៅពេលកំណត់។

អ្នកនាំពាក្យក្រសួងការបរទេសចិន គូសបញ្ជាក់ថា ប្រទេសចិននឹងបន្តធ្វើការយ៉ាងសកម្មដើម្បីសន្តិភាព និងដើរតួនាទីស្ថាបនាសម្រាប់ការបន្ធូរបន្ថយភាពតានតឹង។

ឯកអគ្គរដ្ឋទូតចិនប្រចាំកម្ពុជា លោក Wang Wenbin បានលើកឡើងដែរថា ចាប់តាំងពីជម្លោះរវាងកម្ពុជា និងថៃមានសភាពកាន់តែធ្ងន់ធ្ងរមក ប្រទេសចិនបាន និងកំពុងសម្របសម្រួលតាមរបៀបរបស់ខ្លួន។ លោក Wang Yi រដ្ឋមន្ត្រីការបរទេសចិនបានជជែកតាមរយៈទូរស័ព្ទជាមួយរដ្ឋមន្ត្រីការបរទេសកម្ពុជានិងថៃ ហើយមន្ត្រីក្រសួងការបរទេសចិនបានរក្សាទំនាក់ទំនងជាមួយកម្ពុជា ថៃ និងប្រទេសអាស៊ានពាក់ព័ន្ធ។ លោក Deng Xijun បេសកជនពិសេសទទួលបន្ទុកកិច្ចការអាស៊ីនៃក្រសួងការបរទេសចិនកំពុងធ្វើការសម្របសម្រួលឱ្យមានការឈប់បាញ់រវាងកម្ពុជានិងថៃ។ លោក Wang Wenbin បានបញ្ជាក់ថា អំពីស្ថានការណ៍កិច្ចខិតខំប្រឹងប្រែងសម្របសម្រួលរបស់លោក Deng Xijun នឹងផ្សព្វផ្សាយនៅពេលសមស្របណាមួយ ហើយភាគីចិននឹងបន្តតាស់តឿនសម្របសម្រួលជំរុញឱ្យមានកិច្ចចរចារយ៉ាងសកម្ម ដើរតួនាទីស្ថាបនាក្នុងការបន្ធូរបន្ថយភាពតានតឹងនៃស្ថានការណ៍៕