នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសនៅថ្ងៃពុធ(ទី ៨ ខែមេសា)ថា អ៊ីស្រាអែលគាំទ្រការសម្រេចចិត្តរបស់សហរដ្ឋអាមេរិកក្នុងការផ្អាកការវាយប្រហារប្រឆាំងនឹងអ៊ីរ៉ង់រយៈពេលពីរសប្តាហ៍ ប៉ុន្តែបានអះអាងថាបទឈប់បាញ់នេះមិនរាប់បញ្ចូលប្រទេសលីបង់ទេ។

នៅក្នុងសេចក្តីថ្លែងការណ៍មួយនៅលើបណ្តាញសង្គម X លោក Netanyahu បាននិយាយថា អ៊ីស្រាអែលគាំទ្រកិច្ចខិតខំប្រឹងប្រែងរបស់ប្រធានាធិបតីអាម៉េរិកលោក Donald Trump ដើម្បីធានាថា អ៊ីរ៉ង់លែងបង្កការគំរាមកំហែងនុយក្លេអ៊ែរ មីស៊ីល និងភេរវកម្មដល់អាម៉េរិក អ៊ីស្រាអែល ប្រទេសជិតខាងអារ៉ាប់របស់អ៊ីរ៉ង់ និងពិភពលោកទៀតហើយ។ ប៉ុន្តែសេចក្តីថ្លែងការណ៍នេះបាននិយាយថា បទឈប់បាញ់មិនរាប់បញ្ចូលប្រទេសលីបង់ទេ ដែលផ្ទុយនឹងការប្រកាសពីមុនរបស់នាយករដ្ឋមន្ត្រីប៉ាគីស្ថាន លោក Shehbaz Sharif ដែលបានដើរតួជាអ្នកសម្របសម្រួលក្នុងជម្លោះនេះ។ លោក Sharif បាននិយាយថា សហរដ្ឋអាមេរិក និងសម្ព័ន្ធមិត្តរបស់ខ្លួនបានយល់ព្រមលើបទឈប់បាញ់គ្រប់ទីកន្លែង រួមទាំងប្រទេសលីបង់ផងដែរ ដោយបង្ហាញថា អ៊ីស្រាអែលបានយល់ព្រមបញ្ឈប់ការឈ្លានពានរបស់ខ្លួនទៅលើប្រទេសជិតខាងភាគខាងជើងរបស់ខ្លួន។

គួរបញ្ជាក់ផងដែរថា ប្រទេសលីបង់ត្រូវបានអូសទាញចូលទៅក្នុងសង្គ្រាមនៅថ្ងៃទី ២ ខែមីនា បន្ទាប់ពីក្រុមហេសបូឡាដែលមានសម្ព័ន្ធមិត្តជាមួយអ៊ីរ៉ង់បានបើកការវាយប្រហារលើអ៊ីស្រាអែល។ ទោះជាយ៉ាងណា មិនទាន់មានការអត្ថាធិប្បាយភ្លាមៗពីក្រុមហេសបូឡា ឬប្រទេសលីបង់នៅឡើយទេ៕