ខេត្តបន្ទាយមានជ័យ៖ ភ្លៀងមួយយ៉ាងធំបានបង្អុរចុះ លាយឡំផ្គរ រន្ទះ និងខ្យល់កន្រ្ដាក់ កាលពីល្ងាច ថ្ងៃទី១ ខែឧសភា ឆ្នាំ២០១៩ បានវាយប្រហារទៅលើភូមិសាស្រ្ដីចំនួន៥ស្រុក-ក្រុង នៃទឹកដីខេត្តបន្ទាយមានជ័យ បណ្ដាលឲ្យមនុស្សស្លាប់ និងម្នាក់ទៀតរងរបួស ហើយផ្ទះសំបែងរបស់ប្រជាពលរដ្ឋចំនួន៩៦ខ្នង។

តាមសំដីពលរដ្ឋថា នៅថ្ងៃទី១ ឧសភា កន្លងទៅមាន ផ្ទៃមេឃពណ៍ខ្មៅមានភ្លៀង ផ្គរ រន្ទះ និងបក់បោកយ៉ាងខ្លាំង បណ្តាលឲ្យផ្ទះសំបែង ប្រជាពលរដ្ឋរួមទាំងសាលាឃុំ សាលារៀន និងតូបលក់ដូរ ចំនួន៥ស្រុក-ក្រុង បានរងនូវការខូចខាត សរុបចំនួន៩៦ខ្នង រន្ទះបាញ់មនុស្សស្លាប់ម្នាក់ របួសម្នាក់ ។

តាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ បានឲ្យដឹង នៅថ្ងៃទី០២ ខែឧសភា ឆ្នាំ២០១៩នេះ ថា៖ ស្រុក-ក្រុងដែលរងនូវការខូចខាត ផ្ទះសំបែងនោះ រួមមាន៖ ១.ស្រុកព្រះនេត្រព្រះ ខូចខាតចំនួន២ខ្នង(របើកដំបូល) មានរន្ទះបាញ់មនុស្សស្លាប់ម្នាក់ ឈ្មោះ គឹម ពេទ ភេទប្រុស អាយុ៤៥ឆ្នាំ រស់នៅភូមិស្រះខ្ទម្ព ឃុំបុស្បូវ ស្រុកព្រះនេត្រព្រះ ខណៈជនរងគ្រោះ ទៅដាក់អង្គុបសត្វកណ្តុរ នៅចម្ងាយពីភូមិ ប្រហែល២០០០ម៉ែត្រ។

២.ស្រុកថ្មពួក ខូចខាត ចំនួន៤៤ខ្នង( របើកដំបូលផ្ទះចំនួន៤៣ខ្នង តូប១ខ្នង),មានរន្ទះបាញ់អង់តែន ឆ្លងចរន្តបណ្តាលឆក់របួសមនុស្សម្នាក់ឈ្មោះ ហាន សួន ភេទស្រី អាយុ៦៣ឆ្នាំ រស់នៅភូមិថ្មីកណ្តាល ឃុំភូមិថ្មី ស្រុកថ្មពួក។ ៣.ស្រុកអូរជ្រៅ ខូចខាតចំនួន៤៨ខ្នង(របើកដំបូលផ្ទះ៤៦ខ្នង,សាលាឃុំខ្នង,សាលារៀន១ខ្នង)។៤.ក្រុងសិរីសោភ័ណ ចំនួន១ខ្នង(របើកដំបូល)។ ៥.ស្រុកស្វាយចេក ខូចខាត ១ខ្នង(របើកដំបូល)។

របាយការណ៍បង្ហាញថា៖នៅថ្ងៃទី០២ខែឧសភា ឆ្នាំ២០១៩នេះ លោកស្នងការខេត្តបន្ទាយមានជ័យ អាត់ ខែម បានដឹកនាំកម្លាំងចុះជួយរុះរើ និងជួសជុលផ្ទះសំបែងជូនប្រជាពលរដ្ឋឡើងវិញ ចំណែកបណ្តាស្រុក ក្រុងមួយចំនួន បន្តជួសជុលនៅថ្ងៃបន្តបន្ទាប់៕ វណ្ណា