លោក Abdul Hafeez Shaikh ទីប្រឹក្សាហិរញ្ញវត្ថុ ប្រាក់ចំណូល និងកិច្ចការសេដ្ឋកិច្ចរបស់នាយករដ្ឋមន្ត្រីប៉ាគីស្ថាន បានប្រកាស កាលពីថ្ងៃទី១៣ ខែឧសភា ឆ្នាំ២០១៩ថា រដ្ឋាភិបាល នៃប្រទេសប៉ាគីស្ថាន និងមូលនិធិរូបិយវត្ថុអន្ដរជាតិ (IMF) បានចុះហត្ថលេខាលើកិច្ចព្រមព្រៀងមួយ ស្តីពីកញ្ចប់ថវិកាជួយសង្គ្រោះសម្រាប់រដ្ឋាភិបាលប៉ាគីស្ថាន។

ថ្លែងទៅកាន់បណ្តាញទូរទស្សន៍ប៉ាគីស្ថាន (PTV) លោក Shaikh បានបញ្ជាក់ថា ក្រុមបច្ចេកទេស នៃប្រទេសប៉ាគីស្ថាន និងក្រុមមូលនិធិរូបិយវត្ថុអន្ដរជាតិ (IMF) បានឯកភាពគ្នាលើកញ្ចប់ថវិកាសង្គ្រោះ សម្រាប់រយៈពេលបីឆ្នាំ។ នៅក្នុងកិច្ចព្រមព្រៀងនេះ ប្រទេសប៉ាគីស្ថាននឹងទទួលបានថវិកាជំនួយ ចំនួន៦ពាន់លានដុល្លារអាមេរិក។

លោកទីប្រឹក្សារូបនេះ បានបន្តថា "បន្ទាប់ពីមានកិច្ចពិភាក្សា និងការចរចាជាច្រើនខែនោះមក កិច្ចព្រមព្រៀងកម្រិតថ្នាក់បុគ្គលិក បានសម្រេចឡើង រវាងប៉ាគីស្ថាន និង IMF" ។ កិច្ចព្រមព្រៀងនេះ ទាមទារការអនុម័តបន្ថែម ពីក្រុមប្រឹក្សាភិបាល របស់ IMF ប្រចាំនៅទីក្រុងវ៉ាស៊ីនតោន ។ ប៉ុន្តែទោះជាយ៉ាងណាក៏ដោយ កិច្ចព្រមព្រៀងនេះ បានបង្ហាញឲ្យឃើញថា ការកែទម្រង់ប្រកបដោយប្រសិទ្ធភាពរបស់រដ្ឋាភិបាល នៃប្រទេសប៉ាគីស្ថាន បាននិងកំពុងធ្វើឡើង។

បើតាមសេចក្តីថ្លែងការណ៍មួយរបស់ប្រធានបេសកកម្ម IMF ប្រចាំប្រទេសប៉ាគីស្ថាន លោក Ernesto Ramirez Rigo បានបញ្ជាក់ថា គោលនយោបាយសេដ្ឋកិច្ចរបស់ប្រទេសប៉ាគីស្ថាន អាចត្រូវបានគាំទ្ រដោយកិច្ចព្រមព្រៀងមូលនិធិបន្ថែម (EFF) រយៈពេល៣៩ខែ ដែលមានទឹកប្រាក់ ប្រហែល៦ពាន់លានដុល្លារអាមេរិក៕