រដ្ឋាភិបាលឡាវ គ្រោងដំឡើងពន្ធលើផលិតផលគ្រឿងស្រវឹង ហើយបន្ថយពន្ធលើផលិតផលចាំបាច់ក្នុងជីវភាពប្រជាជនដូចជា សាំង និងម៉ូតូជាដើម ប្រសិនបើច្បាប់ថ្មីចូលជាធរមាននៅខែមករា ឆ្នាំ២០២០។ នេះបើតាមការចុះផ្សាយរបស់ Vientianetimes នៅថ្ងៃទី២០ ខែមិថុនា ឆ្នាំ២០១៩។

លោក Somdy Duangdy ឧបនាយករដ្ឋមន្រ្តី រដ្ឋមន្រ្តីក្រសួងហិរញ្ញវត្ថុឡាវ បានធ្វើបទបង្ហាញស្តីពីខ្លឹមសារនៃច្បាប់ពន្ធដារថ្មីនេះ ទៅកាន់សភាកាលពីថ្ងៃទី១៩ ខែមិថុនា ឆ្នាំ២០១៩។ លោកបានសង្កត់ធ្ងន់ពីសារៈសំខាន់នៃការអនុម័តច្បាប់ថ្មីនេះ ដើម្បីឆ្លុះបញ្ចាំងពីតថភាពសង្គមជាតិ និងស្របតាមក្របខណ្ឌអន្តរជាតិ។

ក្រោមសេចក្តីព្រាងច្បាប់ពន្ធដារថ្មីនេះ បង្ហាញថា តម្លៃពន្ធសាំងនឹងត្រូវថយពី ៩% មកនៅត្រឹម ៥% ឬពី ៣៩% មកនៅត្រឹម ៣៥% តាមប្រភេទសាំង។ ចំណែកម៉ូតូកម្លាំង ១១០សេសេស នឹងត្រូវបញ្ចុះពន្ធពី ២០% មកនៅត្រឹម ៥% តែប៉ុណ្ណោះដើម្បីជួយគាំទ្រដល់អ្នកមានចំណូលទាប។ ចំណែកពន្ធលើដំណើរអ៊ីនធើណែត ក៏ត្រូវកាត់បន្ថយផងដែរ ពី ១០% មកនៅត្រឹម ៣%។

ចំពោះការដំឡើងពន្ធវិញ ក្រៅពីផលិតផលគ្រឿងស្រវឹង រដ្ឋាភិបាលឡាវក៏គ្រោងដំឡើងពន្ធលើប្រតិបត្តិការអាជីវកម្មវាយកូនហ្គោល កាស៊ីណូ និងហ្គេមកាស៊ីណូផងដែរ៕