ភ្នំពេញក្រោនប្ដេជ្ញាបង្អាក់ដំណើរស្វាយរៀងដើម្បីធ្វើឲ្យលីគកាន់តែជក់ចិត្ត

#កីឡាអន្តរជាតិ# #កីឡា# #ភ្នំពេញក្រោន# #លីគ#

ភ្នំពេញក្រោននឹងត្រូវបើកទ្វារកីឡដ្ឋាន Smart RSN ទទួលក្លឹបព្រះខ័នរាជស្វាយរៀង នាល្ងាចថ្ងៃទី២៨ ខែកក្កដាចុងសប្ដាហ៍នេះ ដែលជាការប្រកួតដ៏ធំប្រចាំសប្ដាហ៍ទី១៧ នៃលីគកំពូលកម្ពុជា ហើយការប្រកួតនេះដែរត្រូវបានគ្រូបង្វឹកភ្នំពេញក្រោន ប្ដេជ្ញានឹងព្យាយាមបង្អាក់ដំណើរព្រះខ័នរាជស្វាយរៀងឲ្យបាន ដើម្បីរក្សាការប្រកួតប្រជែងក្នុងលីគកាន់តែល្អមើល និងជក់ចិត្តថែមទៀត។

លោក ស៊ុំ វណ្ណា គ្រូបង្វឹកបណ្ដោះអាសន្នរបស់ក្រុមកំពុងឈរលេខរៀងទី៦ បានទទួលស្គាល់ព្រះខ័នរាជស្វាយរៀង គឺជាក្រុមមួយល្អពេកហើយក្នុងរដូវកាលថ្មីនេះ តែប៉ះគ្នាក្នុងដីថ្ងៃអាទិត្យនេះលោកនឹងព្យាយាមធ្វើយកឈ្នះ ឬយ៉ាងហោចស្មើឲ្យបាន ដើម្បីធ្វើឲ្យគម្លាតពិន្ទុរវាងក្រុមកំពូលតារាង និងគូប្រជែងប្រកៀកប្រកិតគ្នា ក៏ដូចជាការវាស់ស្ទង់កម្រិតសមត្ថភាពក្រុមខ្លួនទៅនឹងក្រុមលោក Conor Nestor ផងដែរ។ បើក្រឡេកទៅមើលប្រវត្តិធ្លាប់ជួបគ្នារវាងក្រុមខ្លាំងទាំងពីរ គឺឈ្នះ-ចាញ់គ្នាទៅវិញទៅមក ជាក់ស្ដែងដូចកាលមុនជើងទី១ ប្រកួតលើទឹកដីស្វាយរៀងម្ចាស់ផ្ទះឈ្នះ ហើយមកប្រកួតជើងទី២ លើកទឹកដី RSN ភ្នំពេញក្រោនឈ្នះវិញ។ ដូច្នេះគ្នាដែរឆ្នាំនេះជើងទី១ ប្រកួតលើទឹកដីស្វាយរៀងក្រុមលោក Conor Nestor បន្ដឈ្នះទៀត ហើយជើងទី២ នឹងត្រូវប្រកួតលើទឹកដី RSN ជាថ្មីនាថ្ងៃអាទិត្យនេះ។ ចាំមើលក្រុមលោក ស៊ុំ វណ្ណា អាចសងសឹក និងសម្រេចបំណងប្រាថ្នាលោកបានទេ?

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។