TNAOT News

· 2020-04-04

តើពលរដ្ឋនៅលើពិភពលោកជាង​១លាន ឬ១០លាននាក់ ឆ្លងកូវីដ-១៩?

#ពិភពលោក# #COVID-19# #អូស្រ្ដាលី# #អឺរ៉ុប# #សង្គម# #អាមេរិក# #ព័ត៌មានសង្គម#

6049

បច្ចុប្បន្ន នៅលើពិភពលោក​មានករណីឆ្លងកូវីដ-១៩ ជាង​១លាននាក់​ និងស្លាប់ជាង​៥៩ពាន់នាក់។ ប៉ុន្តែបើតាមក្រុមអ្នកឯកទេសផ្នែកវេជ្ជសាស្រ្ដ បានបញ្ជាក់ថា ​ចំនួនអ្នកឆ្លងពិតប្រាកដ គឺអាចនឹងមានច្រើនជាងនេះ ព្រោះ​នៅលើ​ពិភពលោកខ្វះឧបករណ៍ធ្វើតេស្ត​ ស្វែងរកកូវីដ១៩។ មិនតែប៉ុណ្ណោះ អ្នកមានអាការជំងឺស្រាល មិនត្រូវបានរាប់បញ្ចូល​ឡើយ ហើយប្រទេសមួយចំនួនក៏នៅតែមានការលាក់បាំងតួលេខពិតប្រាកដ​អំពី​ការ​ឆ្លង​រាលដាល នៃវីរុសនេះដែរ​។

មន្ត្រីជាន់ខ្ពស់ នៃក្រសួងសុខាភិបាលអូស្ត្រាលី លោក Brendan Murphy បានវាយតម្លៃថា ចំនួនអ្នកឆ្លងកូវីដ១៩ អាចនឹងកើនដល់១០លាននាក់ហើយ ប៉ុន្តែតួលេខខ្លះ​មិនត្រូវបានកត់ត្រាចូលក្នុងបញ្ជី ដោយសារ​តែ​អ្នកទាំងនោះ​មិនទាន់បានធ្វើតេស្ត​។

លោក Brendan Murphy បានថ្លែងទៅកាន់ក្រុមអ្នកសារព័ត៌មានថា ​«រហូតមកដល់ពេលនេះ យើងឃើញមានអ្នកឆ្លង ជាង​១លាននាក់ហើយ នៅលើពិភពលោក។ ប៉ុន្តែតួលេខ នៃចំនួនអ្នកឆ្លងពិតប្រាកដ អាចនឹងច្រើន ជាងនេះ ចន្លោះ​ពី៥-១០ដង​»។ ជាមួយគ្នានេះដែរ អង្គការសុខភាពពិភពលោក  (WHO) ក៏​បានអំពាវនាវឲ្យបង្កើនការត្រួតពិនិត្យ​ ធ្វើតេស្តស្វែងរកវីរុសឲ្យបានលឿនបំផុត ដើម្បីចៀសវាងស្ថានការណ៍ នៃការរាតត្បាត​កាន់តែ​ធ្ងន់ជាងនេះ។

បច្ចុប្បន្ន អូស្ត្រាលី មានអ្នកឆ្លង កើនឡើងជាង​៥៥០០ នាក់ និងស្លាប់​៣០នាក់ ហើយអ្នកត្រូវបានព្យាបាលជាសះស្បើយ មានចំនួន​៦៣៦នាក់។ ជាមួយគ្នានេះ រដ្ឋាភិបាលអូស្ត្រាលីបាន និងកំពុង​ចាត់វិធានការ​យ៉ាង​តឹង​រឹង​បំផុត ដើម្បីទប់ស្កាត់វីរុសដ៏កាចសាហាវនេះ ដោយខ្លាចការឆ្លងរាលដាលកាន់តែច្រើន ធ្លាក់ចូលក្នុងស្ថានការណ៍ ដូច នៅតំបន់អឺរ៉ុប និងអាមេរិក​៕ ប្រែសម្រួលដោយ៖ MEO

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និង​គោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។

យោបល់ទាំងអស់ (0)

ការណែនាំពិសេស