គណៈរដ្ឋមន្រ្ដីថៃ កាលពីថ្ងៃទី៧ ខែមេសា បានអនុម័តកញ្ចប់ថវិកាទ្រទ្រង់សេដ្ឋកិច្ច ចំនួន ១,៩ពាន់ពាន់លានបាត (លុយថៃ) ឬស្មើនឹង ៥៧ ៩៣០ ៤៨០ ៣២៩ដុល្លារអាមេរិក ដើម្បីទប់ស្កាត់ពីផលប៉ះពាល់ នៃ​វិបត្ដិ​កូវីដ១៩។

បណ្ដាញផ្សព្វផ្សាយរបស់ថៃ បានផ្សាយ នៅថ្ងៃទី៨ ខែមេសា ថា លោក ប្រាយុទ្ធ ចាន់អូចា (Prayut Chan-o-cha ) នាយករដ្ឋមន្រ្ដីថៃ កាលពីថ្ងៃទី៧ ខែមេសា បានដឹកនាំប្រជុំគណៈរដ្ឋមន្រ្ដី​ប្រចាំសប្ដាហ៍ ដើម្បី ពិចារណាលើដំណាក់កាលទី៣ នៃវិធានការសម្រាប់ដោះស្រាយបញ្ហាវិបត្ដិ នៃកូវីដ១៩។ កញ្ចប់ថវិកាដ៏សំខាន់នេះជាក្រឹត្យមួយ អនុញ្ញាតឲ្យរដ្ឋាភិបាលខ្ចីលុយចំនួន១ពាន់ពាន់លានបាត (1 trillion) ឬស្មើនឹង ៣០ ៤៨៩ ៧២៦ ៤៨៩ដុល្លារអាមេរិក​ សម្រាប់ជំរុញឲ្យវិស័យសុខាភិបាលសាធារណៈមានភាពល្អប្រសើរ និងជួយឲ្យសេដ្ឋកិច្ចកាន់តែរីកចម្រើនឡើង។

ប្រភពព័ត៌មានដដែល បានបន្ដថា​ ក្រឹត្យ២ផ្សេងទៀតនឹងត្រួសត្រាយផ្លូវដល់ធនាគារ ដើម្បីផ្ដល់ប្រាក់ចំនួន៩០០ពាន់លានដុល្លារ ក្នុងប្រាក់កម្ចី និងទទួលបានមូលបត្រពីក្រុមហ៊ុន។ គណៈរដ្ឋមន្រ្ដីក៏បានយល់ព្រមកែសម្រួលការបែងចែកថវិកាឱ្យសមស្របនឹងស្ថានភាពសេដ្ឋកិច្ចបច្ចុប្បន្ន និងកាត់បន្ថយផលប៉ះពាល់ នៃ Covid-19 ។ រីឯក្រសួងនីមួយៗ គ្រោងនឹងស្នើថវិកាបន្ថែមទៀត ដើម្បីប្រយុទ្ធប្រឆាំងនឹងវីរុសរាតត្បាត ហើយកាត់បន្ថយថវិកាដែលបានបម្រុងទុកសម្រាប់តំបន់ផ្សេងៗទៀត។

ជាមួយគ្នានេះដែរ ក្រសួងហិរញ្ញវត្ថុបានស្នើឱ្យមានការលើកលែងពន្ធលើឧបករណ៍ដែលបាននាំចូល សម្រាប់កិច្ចការពារ ឬធ្វើរោគវិនិច្ឆ័យ នៃ Covid-19 ។

បើគិតត្រឹមវេលាម៉ោង៣រសៀល ថ្ងៃទី៨ ខែមេសា ឆ្នាំ២០២០ នៅក្នុងប្រទេសថៃ មានអ្នកឆ្លងវីរុសកូវីដ១៩ ចំនួន២៣៦៩នាក់ ក្នុងនោះស្លាប់៣០នាក់ និងអ្នកត្រូវព្យាបាលជាសះស្បើយចំនួន៨៨៨នាក់៕ ប្រែសម្រួលដោយ Nuon