ដោយសារការរាតត្បាត នៃវីរុសកូវីដ១៩ នៅពាសពេញពិភលោក រហូតធ្វើឲ្យសេដ្ឋកិច្ច នៃបណ្ដាប្រទេសនានា ប្រឈមនឹងឱនភាព ទើបក្រុមតំណាង នៃវិស័យឯកជនរបស់ថៃ បានអះអាងថា ឱនភាពសេដ្ឋកិច្ច នៃប្រទេសថៃ នៅក្នុងឆ្នាំនេះ មិនអាចប៉ាន់ប្រមាណបានឡើយ។

តំណាងវិស័យឯកជនបានបង្កើតជាគណៈកម្មាធិការអចិន្រ្ដៃយ៍រួម ស្ដីអំពីពាណិជ្ជកម្ម ឧស្សាហកម្ម និងធនាគារ (JSCCIB) បានថ្លែងថា​ នៅឆ្នាំនេះ សេដ្ឋកិច្ចទំនងជាប្រឈមនឹងឱនភាព។ ទោះជាយ៉ាងណាក៏ដោយ​ JSCCIB  បានបញ្ជាក់ថា ខ្លួននឹងមិនអាចប៉ាន់ស្មានបានឡើយ អំពីផលប៉ះពាល់លើសេដ្ឋកិច្ច ពីការរាតត្បាត នៃកូវីដ១៩នេះ។

គណៈរដ្ឋមន្រ្ដីថៃ កាលពីថ្ងៃទី៧ ខែមេសា បានអនុម័តកញ្ចប់ថវិកាទ្រទ្រង់សេដ្ឋកិច្ច ចំនួន១,៩ពាន់ពាន់លានបាត (លុយថៃ) ឬស្មើនឹង ៥៧ ៩៣០ ៤៨០ ៣២៩ដុល្លារអាមេរិក ដើម្បីទប់ស្កាត់ផលប៉ះពាល់ នៃវិបត្ដិកូវីដ១៩។

លោក ប្រាយុទ្ធ ចាន់អូចា (Prayut Chan-o-cha ) នាយករដ្ឋមន្រ្ដីថៃ កាលពីថ្ងៃទី៧ ខែមេសា បានដឹកនាំប្រជុំគណៈរដ្ឋមន្រ្ដី​ប្រចាំសប្ដាហ៍ ដើម្បីពិចារណាលើដំណាក់កាល៣ នៃវិធានការសម្រាប់ដោះស្រាយបញ្ហាវិបត្ដិ នៃកូវីដ១៩។ ក្រៅពីនេះ គណៈរដ្ឋមន្រ្ដី ក៏បានអនុញ្ញាតឲ្យរដ្ឋាភិបាលខ្ចីលុយចំនួន១ពាន់ពាន់លានបាត (1 trillion) ឬស្មើនឹង ៣០ ៤៨៩ ៧២៦ ៤៨៩ដុល្លារអាមេរិក​ សម្រាប់ជំរុញឲ្យវិស័យសុខាភិបាលសាធារណៈ​មាន​ភាពល្អប្រសើរ និងជួយឲ្យសេដ្ឋកិច្ចកាន់តែរីកចម្រើនឡើងបន្ថែមទៀតផង។

ជាមួយគ្នានេះដែរ គណៈរដ្ឋមន្រ្ដីថៃ កាលពីពេលថ្មីៗកន្លងមកនេះ បានប្រកាសថា រដ្ឋាភិបាលថៃនឹងប្រើប្រាស់ថវិកា ចន្លោះពី៨០-១០០ពាន់លានបាត (ប្រាក់ថៃ) ពីថវិកាសារពើពន្ធរបស់ខ្លួន បូករួមនឹងប្រាក់កម្ចី (Soft Loan) ចំនួន ៩០០ ពាន់លានបាតពីធនាគារថៃ (BOT) និងក្រឹត្យផ្តល់ប្រាក់កម្ចីបន្ទាន់ តម្លៃ១០០០ពាន់លានបាត ដើម្បីទប់ទល់នឹងផលប៉ះពាល់ នៃការផ្ទុះឡើងនៃវីរុសនេះ លើបុគ្គល និងអាជីវកម្ម។

ទោះជាយ៉ាងណា JSCCIB ​បានបញ្ជាក់ថា ការនាំចេញអាចនឹងធ្លាក់ចុះ ចន្លោះពី៥ទៅ១០ភាគ។ ប៉ុន្ដែរដ្ឋាភិបាលនៅតែបន្ដជំរុញវិធានការគាំទ្រទាំងបុគ្គលិក និងវិស័យអាជីវកម្មនេះ។ រីឯ JSCCIB ត្រូវរង់ចាំមើលថា តើវិធានការទាំងនេះ នឹងប៉ះពាល់ដល់សេដ្ឋកិច្ចដំបូ ង មុននឹងព្យាករថ្មីណាមួយ៕ ប្រែសម្រួលដោយ Nuon