នេះជាឱកាសល្អសម្រាប់អ្នក ដែលអាចចំណាយពេលនៅជាមួយក្រុមគ្រួសារ ដើម្បីបង្កើនចំណងទំនាក់ទំនងជាមួយកូនៗ ដោយធ្វើពួកគេមានអារម្មណ៍កក់ក្ដៅ ទទួលបានក្ដីស្រលាញ់ពីអ្នក។

ទាំងនេះ គឺជាវិធីមួយចំនួនសម្រាប់ឪពុកម្ដាយ និងអាណាព្យាបាល អាចអនុវត្តបានក្នុងកំឡុងពេលសម្រាកនៅផ្ទះ គ្រាកូវីដរាលដាល៖

១.កំណត់ពេលវេលាក្នុងការចំណាយពេលជាមួយកូនម្នាក់ៗ

ឪពុកម្ដាយ ឬអាណាព្យាបាល អាចប្រើប្រាស់ពេលត្រឹមតែ ២០នាទី ឬយូរជាងនេះ ទៅតាមការកំណត់របស់លោកអ្នក រៀងរាល់ថ្ងៃ ក្នុងពេលវេលាដដែល ទើបកូនៗអាចត្រៀមខ្លួនចាំលេងជាមួយលោកអ្នកដែលជាឪពុកម្ដាយ។

២.ការកំសាន្ដជាមួយកូនតូចៗ អាចសាកល្បងលេងល្បែង ដូចជា៖

• ការធ្វើត្រាប់តាមទឹកមុខ ឬសម្លេង
• ការច្រៀងលេង ការយកស្លាបព្រា និងឆ្នាំង គោះជាភ្លេង
• ការលេងល្បែងផ្គុំកែវ ឬប្រអប់
• និទានរឿងនាំកូនៗអានសៀវភៅ និងរូបភាពផ្សេងៗជាដើម។ (ទារក ឬកូនតូចៗ)។

៣.ព្យាយាមកាត់បន្ថយការឱ្យពួកគេ មើលទូរទស្សន៍ ឬលេងទូរស័ព្ទ

• ដោយនាំពួកគេអានសៀវភៅ មើលរូបភាព
• គូររូប ផាត់ពណ៌
• រាំច្រៀង
• ធ្វើកិច្ចការងារផ្ទះ សម្អាតផ្ទះ ឬធ្វើម្ហូបជាមួយដើម
• ធ្វើកិច្ចការសាលា។ (កូនតូចៗ ឬកូនវ័យជំទង់)។

៤.អ្នកអាចសួរយោបល់កូនរបស់លោកអ្នក ថាតើពួកគេចង់ចំណាយពេលធ្វើអ្វីជាមួយលោកអ្នកដែលជាឪពុកម្ដាយ

ការធ្វើបែបនេះ យើងនឹងអាចជួយឱ្យពួកគេកសាងទំនុកចិត្ត និងផ្ដល់ឱកាសឱ្យកូនៗសម្រេចចិត្តពីអ្វីដែលគេចង់ធ្វើ បើសិនវាជាអ្វីដែលទាក់ទងទៅនឹងសកម្មភាពខាងក្រៅ ដោយអ្នកត្រូវនិយាយពន្យល់បួកគេដោយមានហេតុផល។ (កូនតូច ឬជំទង់)៕