ភ្លើងឆេះព្រៃ​ចាប់ផ្តើមឆេះអស់រយៈពេលជាច្រើនថ្ងៃកន្លងមកហើយនោះ តែរហូតមកដល់​ថ្ងៃទី១៣ ខែមេសា ឆ្នាំ២០២០ បានឆេះរាលដាលចូលជិត​ដល់​រោងចក្រ​នុយក្លេអ៊ែរ ដែលទុក​ចោលឈ្មោះ Chernobyl ស្ថិតនៅភាគខាង​ជើង នៃប្រទេសអ៊ុយក្រែន​ ។

បណ្ដាញទូរទស្សន៍ប៊ីប៊ីស៊ី បានផ្សាយថា ភ្លើងបានឆេះរាលដាលចូលកៀក​កន្លែងទុកកាក​សំណល់ប្រកបដោយ​គ្រោះថ្នាក់បំផុត​របស់រោងចក្រនេះ។ 

ប្រភពព័ត៌មាននៅក្នុងតំបន់ ​បានបញ្ជាក់ថា ភ្លើងឆេះព្រៃ ​បានឆេះ​គ្របដណ្តប់លើផ្ទៃដី​ ប្រហែល​៣៤ ០០០ ហិកតា  ខណៈភ្លើងឆេះព្រៃទី២ បានឆេះ​ចម្ងាយប្រហែល​១គីឡូម៉ែត្រ​ប៉ុណ្ណោះ​ពីរោងចក្រនុយក្លេអ៊ែរ ដែលមានផ្ទៃដី​ប្រហែល ១២ ០០០ ហិកតា​ នៅក្នុងតំបន់នោះ ។ 

អាជ្ញាធរ​អ៊ុយក្រែន ​បានបញ្ជាក់ថា ភ្លើងឆេះព្រៃ​ចាប់ផ្តើមឆេះ តាំងពីថ្ងៃទី៥ ខែមេសា ឆ្នាំ២០២០ បន្ទាប់ពីបុរសម្នាក់​បានដុតស្មៅស្ងួត​ក្នុងតំបន់​ ហើយវាឆេះរាលដាល​ហួស​ពីសមត្ថភាព​គ្រប់គ្រង ។ 

ក្រុមពន្លត់អគ្គិភ័យ​ជាង​៣០០​នាក់​ បូករួមទាំងរថយន្តបាញ់ទឹក​រាប់សិបគ្រឿង​ និងឧទ្ធម្ភាគចក្រ​៦គ្រឿង កំពុងប្រតិបត្តិការ​ពន្លត់ភ្លើងឆេះ​ព្រៃ នៅក្នុងតំបន់នោះទាំងយប់ទាំងថ្ងៃ ។ 

អ្នកជំនាញផ្នែកសេវាកម្មត្រួតពិនិត្យ​អេកូឡូស៊ី​​​ បានបញ្ជាក់ថា កម្រិតវិទ្យុសកម្ម​ នៅក្នុងតំបន់​បានកើនឡើង​គួរឲ្យកត់សម្គាល់​ គឺខុសប្លែក​ពី​ធម្មតា។ ប៉ុន្តែមន្ត្រីរដ្ឋាភិបាល​វិញ ​អះអាងថា កម្រិត​នៅក្នុងតំបន់​ ស្ថិតនៅក្នុងដែនកំណត់ធម្មតា ។

ផ្សែង​ខ្មួលខ្មាញ់​បណ្តាលមកពីភ្លើងឆេះព្រៃ​​នោះ​ បានបក់បោក​ទៅដល់ទីក្រុងគៀវផងដែរ។ 

គួរបញ្ជាក់ថា រោងចក្រនុយក្លេអ៊ែរ Chernobyl និងទីក្រុង Pripyat ​ក្បែរខាងរបស់អ៊ុយក្រែន ​ត្រូវបានបោះបង់ចោល តាំងពីឆ្នាំ​១៩៨៦មកម្ល៉េះ ខណៈ​ម៉ាស៊ីនរ៉េអាក់ទ័រ​លេខ​៤ នៃរោងចក្រនុយក្លេអ៊ែរ​​បានផ្ទុះឡើង។ 

ហេតុការណ៍​កាលណោះ​បាន​សាយភាយ​រលកវិទ្យុសកម្ម​​ នៅពាសពេញទូទាំង​តំបន់អឺរ៉ុប​តែម្តង ហើយតំបន់ជុំវិញ​រោងចក្រ​​ ភាគខាងជើងអ៊ុយក្រែននោះ ក៏ជាកន្លែងរកផលប៉ះពាល់​ធ្ងន់ធ្ងរ​ជាងគេបំផុត។ 

ពលរដ្ឋ​ត្រូវបានហាម​ប្រាម​​ នៅឲ្យឆ្ងាយ​ពីទីតាំងរោងចក្រនុយក្លេអ៊ែរនេះ​ មានចម្ងាយប្រហែល​៣០គីឡូម៉ែត្រ។ 

រោងចក្រនុយក្លេអ៊ែរ​ Chernobyl បានបន្តបង្កើតថាមពលរបស់ខ្លួន រហូតដល់ម៉ាស៊ីនរ៉េអាក់ទ័រ​ប្រតិបត្តិការចុង​ក្រោយរបស់រោងចក្រ ដោយបានបិទនៅក្នុងឆ្នាំ ២០០០ ៕ ប្រែសម្រួលដោយ៖ thach yat