ភ្នំពេញ៖ កម្មករ-កម្មការិនី ដែលវិលត្រឡប់ចូលមកបម្រើការងារវិញ បន្ទាប់ពីទៅស្រុកកំណើតអំឡុងពិធីបុណ្យចូលឆ្នាំខ្មែរប្រពៃណីជាតិ ត្រូវចាត់វិធីការចត្តាឡីស័ក (ដាក់នៅឱ្យដាច់ដោយឡែក) រយៈពេល ១៤ថ្ងៃ។ នេះបើយោងតាមសេចក្ដីប្រកាសរបស់ក្រសួងសុខាភិបាល។

គួរបញ្ជាក់ថា រាជរដ្ឋាភិបាល បានដាក់ចេញបទបញ្ជា លើកំហិតការធ្វើដំណើរចាប់ពីថ្ងៃទី១០ ដល់ថ្ងៃទី១៦ ខែមសា ឆ្នាំ២០២០ ដើម្បីបង្ការ និងទប់ស្កាត់ការឆ្លងរីករាលដាលនៃជំងឺកូវីដ១៩ ដោយដាក់កំហិតមិនឱ្យឆ្លងពីខេត្តមួយទៅខេត្តមួយ ពីរាជធានីទៅខេត្ត និងពីខេត្តមករាជធានី។ ប៉ុន្តែ រាជរដ្ឋាភិបាល បានចេញសេចក្ដីប្រកាសដកបម្រាមធ្វើដំណើរចេញវិញ ចាប់ពីម៉ោង ៦៖០០នាទីព្រឹកថ្ងៃទី១៦នេះតទៅ។

នៅក្នុងសេចក្ដីប្រកាសរបស់ក្រសួងសុខាភិបាល បានបញ្ជាក់ថា ស្ថានភាពជំងឺកូវីដ១៩ ស្ថិតនៅក្នុងដំណាក់កាលដែលយើងត្រូវតែមានការប្រុងប្រយ័ត្នខ្ពស់បំផុត ដើម្បីកុំឱ្យមានការចម្លងរាតត្បាតចូលសហគមន៍ ជាពិសេសការធ្វើដំណើរចល័តរបស់បុគ្គលពីកន្លែងមួយទៅកន្លែងមួយ ដែលមិនបានគោរពតាមបទបញ្ជារបស់ សម្ដេចតេជោនាយករដ្ឋមន្ត្រី នាឱកាសបុណ្យចូលឆ្នាំប្រពៃណីជាតិខ្មែរ ដែលមានការសម្រុកចេញទៅស្រុកកំណើតនាកន្លងមកនេះ។

ក្រសួងបន្តថា ដើម្បីបង្ការហានិភ័យនៃការចម្លងវីរុសកូវីដ១៩ ចំពោះកម្មករ-កម្មការិនី ដែលនឹងត្រូវវិលត្រឡប់មកកន្លែងធ្វើការនៅតាមរោងចក្រ សហគ្រាសរបស់ពួកគេវិញ ក្រសួងសុខាភិបាល សូមស្នើរក្រសួងការងារ និងបណ្ដុះបណ្ដាលវិជ្ជាជីវៈ សហការចាត់វិធានការលើបុគ្គលទាំងនោះ ដោយត្រូវតែដាក់ខ្លួនឱ្យនៅដាច់ដោយឡែក នៅកន្លែងស្នាក់នៅរបស់បុគ្គលនោះ ក្នុងរយៈពេលចំនួន ១៤ថ្ងៃ ជាចាំបាច់ ព្រមទាំងមានការតាមដានក្នុងការអនុវត្តវិធានការចត្តាឡីស័ក និងពិនិត្យតាមដានសុខភាព ពីក្រុមគ្រូពេទ្យនៃក្រសួងការងារ និងបណ្ដុះបណ្ដាលវិជ្ជាជីវៈ។

ក្រសួងសុខាភិបាលបានសង្កត់ធ្ងន់ថា ប្រសិនបើមានបុគ្គលណាម្នាក់មានបញ្ហាសុខភាព ដែលពាក់ព័ន្ធទៅនឹងជំងឺកូវីដ១៩ ក្រុមគ្រូពេទ្យក្រសួងការងារ និងបណ្ដុះបណ្ដាលវិជ្ជាជីវៈ ត្រូវតែទំនាក់ទំនងមកក្រសួងសុខាភិបាលជាបន្ទាន់ ដើម្បីជួយអន្តរាគមន៍ក្នុងការពិនិត្យ និងធ្វើរោគវិនិឆ្ឆ័យបុគ្គលនោះឱ្យបានទាន់ពេលវេលា៕ ដោយ៖ តារា